Klub prezidentinin 13 yaşlı oğlu kokaindən istifadə edib

Frankfurt prokurorluğu “Ayntraxt” futbol klubunun prezidenti Peter Fişerə qarşı araşdırmalara başlayıb.

Futbolxeber.az saytının “Sportschau”ya istinadən verdiyi məlumata görə, o, narkotik maddələrin qanunsuz şəkildə əldə edilməsində və saxlanılmasında ittiham edilir. İstintaqa klub prezidentinin həyat yoldaşı və onun 25 yaşlı böyük oğlu da cəlb olunub.

Məlum olub ki, “Ayntraxt”ın rəhbərinin 13 yaşlı kiçik oğlu sinif yoldaşları ilə birgə kokaindan istifadə edib. Uşaqlardan birinin anası övladının davranışından şübhələnərək bu haqda məktəb rəhbərliyini və polisi məlumatlandırıb.

Ötən ayın sonunda Fişerin evində axtarış aparan polis əməkdaşları kokain aşkarlayıblar. Məhz bundan sonra Fişer, onun həyat yoldaşı və 25 yaşlı böyük oğlu narkotik maddənin düzgün olmayan, azyaşlının əli çatan şəkildə saxlanılmasına görə ittiham olunublar.