Azərbaycan millisindən tarixi nəticə

Avropa çempionatının əsas mərhələsində çərçivəsində 19 yaşadək futzalçılardan ibarət Azərbaycan millisi növbəti oyununu keçirib.

Futbolxeber.az saytının məlumatına görə, komandamız Xorvatiyadan olan həmyaşıdları ilə qarşılaşıb.

Qrupun favoritlərindən sayılan xorvatlar 3-cü dəqiqədə hesabı açsa da, futzalçılarımız fasiləyə üstün yollanmağı bacardı. 7-ci dəqiqədə Fariz Hüseynov tablodakı rəqəmləri eyniləşdirdi. 10 dəqiqə sonra Ədalət Ələkbərov millimizi hesabda önə keçirdi.

İkinci hissədə də komandamızın fərqi artırmaq üçün imkanları oldu. Ancaq 27-ci dəqiqədə yığmamız meydanda azlıqda qaldı. Abdulov rəqib hücumun qarşısını alan zaman cərimə meydanından kənarda topu əli ilə qaytardı ki, belədə referi qırmızı vərəqədən istifadə etməli oldu. 2 dəqiqə azlıqda mübarizə aparan futzalçılarımız rəqibə fərqlənmək imkanı vermədi. 35-ci dəqiqədə hesab yenidən bərabərləşdirdi. Son dəqiqə azı 2 epizodda futzalçılarımız topu rəqibdən “oğurlasa” da, boş qapıya düşə bilmədi. Meydan sahibləri isə sona 12 saniyə qalmış üçüncü topu vurdular. Amma sona qədər mübarizəni davam etdirən futzalçılarımız son saniyə qolu ilə tarixi nəticə qazandı - 3:3.

Belə ki, bu heç-heçə U-19-un əsas mərhələdə qazandığı ilk xal oldu. Millimiz qrupda son oyununu martın 29-da Türkiyə yığmasına qarşı keçirəcək. Görüş Bakı vaxtı ilə saat 19:00-da başlayacaq.

Xorvatiya - Azərbaycan - 3:3

Qollar: Leon Ferençek, 2:48, 34:24, İvan Posaveç, 39:48 // Fariz Hüseynov, 6:56, Ədalət Ələkbərov, 16:11, 39:59

Qırmızı vərəqə: Hüseyn Abdulov, 26:02 (Azərbaycan)

Hakimlər: Liviu Dumitru Çita (Rumıniya), Filipa Prata (Portuqaliya), Rastislav Behancin (Slovakiya)

Omiş. Ribnjak İdman Sarayı