“Araz-Naxçıvan”dan ikinci qələbə

“Araz-Naxçıvan” futzal klubu bu gün UEFA Çempionlar Liqasında növbəti oyununa çıxıb.

Futbolxeber.az saytının məlumatına görə, Azərbaycan çempionu ilkin seçmə mərhələnin A qrupunda ikinci matçını keçirib. Təmsilçimiz Latviyada təşkil olunan görüşdə Almaniya çempionu “Yan Reqensburq” üzərində böyükhesablı qələbə qazanıb. Bununla da Azərbaycan çempionu xallarının sayını 6-ya çatdırıb.

Qrupun digər matçında Türkiyə klubu “İstanbul Şişli” ilə Latviya “Riqa”sı (20:00) üz-üzə gələcəklər.

Qeyd edək ki, “Araz-Naxçıvan” qrupdakı ilk matçında “İstanbul Şişli” üzərində 9:1 hesablı qələbə qazanıb. “Yan Reqensburq” isə “Riqa”ya 1:3 hesabı ilə uduzub.

Azərbaycan çempionu son görüşündə avqustun 26-da yerli “Riqa” ilə münasibətlərinə aydınlıq gətirəcək.

UEFA Çempionlar Liqası

İlkin seçmə mərhələ

A qrupu, II tur

24 avqust

“Araz-Naxçıvan” (Azərbaycan) - “Yan Reqensburq” (Almaniya) - 5:0

Qollar: Katatau, 6:37, Erik, 8:07, Xəzər Ağalızadə, 12:59, İsa Atayev, 25:34, Xətai Bağırov, 26:13

Hakimlər: Drazen Vukçeviç (Monteneqro), Martina Pitsola (İtaliya), Arttu Kinaerenen (Finlandiya)

Salaspils. Salaspils İdman Arenası.