“Qarabağ”ın “Yıxılmadım, ayaqdayam” mesajı...

“Qarabağ” dünən çox vacib qələbə qazandı. Bu qələbə əslində Ağdam klubunun “Yıxılmadım, ayaqdayam” mesajı idi. Son 1 həftədə “Qarabağ”, Qurban Qurbanov haqda o qədər fikirlər səsləndi ki...

Sanki illərdir qrupda oynayan komanda bu deyil... Sanki illərdir Azərbaycan futboluna uğurlar qazandıran Qurban Qurbanov deyil... Sanki illərdir “Qarabağ”ın Avropada tarix yazmasında vasitəçi olan Tahir Gözəl, Əmrah Çəlikəl deyil... Son bir həftədə nələr eşitmədik, nələr oxumadıq ki... Vaxtı ilə Qurban Qurbanov addımını mətbuat konfransı zalına atmamış alqışının səsi asimana bülənd olanların, bir neçə gün əvvəl Valdas Dambrauskasın mətbuat konfransında barmaqları az qalırdı “mozol” bağlasın... Bəziləri artıq Azərbaycan Premyer Liqasının 2026/27 mövsümünün qalibini elan ediblər: “Qaqa, bu “Qarabağ” “Sabah”a bata bilməz”...

Birincisi, istənilən müqayisə uğursuzdur. İkincisi də, bəli, “Sabah” bu gün əla futbol sərgiləyir. Dambrauskas möhtəşəm komanda formalaşdırıb. Amma bir neçə uğursuz oyuna, hətta uğursuz mövsümə görə “Qarabağ”ın üzərindən xətt çəkmək olmaz. Bu, illərdir Azərbaycan futbolunda olmazsa olmazları bacaran kollektivdir. Bəli, “Qarabağ” bu gün alışdığımız səviyyədə deyil. Dünənki matçda da komanda ideal futbol sərgilmədi. Bəlkə də hardasa bəxt də təmsilçimizin tərəfində idi. Ola bilər ki, “Qarabağ” pley-offda “Tvente”yə uduzsun. Ki, bu ehtimal heç də az deyil. Hər halda futbolda hər bir seriyanın sonu var. Əvvəl-axır “Qarabağ”ın da ardıcıl qruplarda (Liqa mərhələlərində) oynamaq seriyası qırılacaq. Yenə də bütün bu sadaladıqlarımız “Qarabağ”ın, Qurban Qurbanovun qazandığı nəticələrin üzərindən xətt çəkməyə əsas vermir.

“Qarabağ” hazırda yenilənmə dövründədir. Qurban Qurbanov axtarışdadır. Bu müddət isə nə bir həftə çəkir, nə də bir ay. Əvvəlki, alışdığımız “Qarabağ”ı görməyimiz altı ay da çəkə bilər, bir il də. Futbolda 3 günə, 5 günə yeni komanda qurmaq mümkün olsaydı, nə var idi ki...

Bütün çatışmazlıqlara baxmayaraq, “Qarabağ”ın dünənki qələbəsi vacib idi. Həm Avropada ən azı daha 2 həftə qalmaq, həm də son bir həftədəki “tənqid yağışına” son qoymaq üçün. Təbii ki, nəticə uğursuzdursa, tənqid olmalıdır. Amma Qurban Qurbanov demişkən, qırmızı xətti aşmamaqla...

Həlledici, “Qarabağ”ı pley-offa daşıyan qolu Kaşukun vurması da təsadüfi deyil. Kiminə görə bu, Qurban Qurbanovun israrının nəticəsi idi, kiminə görə tənqidçilərə çevrilən ən yaxşı cavab. Nəticə yoxdursa, tənqid qaçılmazdır. Amma bird aha təkrar edirik ki, heç bir nəticə, uğursuzluq “Qarabağ”ın qazandığı tarixi zəfərləri unutdurmağa, üstündən xətt çəkməyə əsas vermi...

İBRAHİM