Son 1 ildə geriləyən futbolumuz - YAZI

Feysbuk xatırladır ki, ötən ilin bu günü “Araz-Naxçıvan” tarix yazmışdı. Elmar Baxşıyevin rəhbərliyi altında Naxçıvan klubu UEFA Konfrans Liqasında “Aris”i mübarizədən kənarlaşdırmışdı. Həmin vaxt Yunanıstan klubunu üstələmək həqiqətən də fantastik nəticə idi. Təkcə elə “Aris”in büdcəsinin 50 milyon avro olmasını xatırlamaq, hansı səviyyədə uğur qazanıldığını dərk etmək üçün kifayət edər. Lakin həmin vaxt bəziləri bu uğura ağız büzürdülər. Halbuki həmin qələbə istər Elmar Baxşıyevin, istərsə də “Araz-Naxçıvan”ın möhürü idi.

Bu gün “Zirə” və “Neftçi”nin bacarmadığı “Payde” və “Dinamo”nun büdcələrini topla, vur ikiyə, yenə də “Aris”in büdcəsinin yarısı etməyəcək. Görünən odur ki, son 1 ildə Azərbaycan futbolu geri gedib. “Sabah”ın ardıcıl dörd qələbəsindən sonra bəziləri eyforiyaya qapılaraq “bax, gördünüz, legioner limitinin ləğvinin faydası budur” desələr də, “Payde” və “Dinamo” ilə oyunlar real mənzərəni ortaya qoydu. 1 il əvvəl “Araz-Naxçıvan” özündən qat-qat güclü “Aris”i məğlub edirdi, bu gün isə “Zirə” və “Neftçi” özlərindən qat-qat zəif “Payde” və “Dinamo”ya uduzursa, deməli, son 1 ildə Azərbaycan futbolu irələməyib, geriləyib. Limitin ləğvinin isə avrokuboklardakı çıxışa zərrə qədər də aidiyyəti yoxdur. Çünki limit olan vaxtlarda belə bəzi klublarımız avrokubok matçlarına 9-10 əcnəbi ilə çıxıblar. Yaxud əksinə, elə olub ki, Rəşad Sadıqov “Makkabi” ilə matçda 5 azərbaycanlıya şans verib. Yəni ölkə çempionatındakı legioner limitinin avrokuboklardakı çıxışa hər hansı təsiri yoxdur. Təsiri ümumi Azərbaycan futboluna var. AFFA hər imkanda futbolumuzun irəli getdiyini iddia etsə də, reallıq başqadır.

Bu gün “Sabahın ulduzları” turnirinin açılış mərasimi olacaq. Daha əvvəl də yazmışdım, təşəbbüs gözəldir. Amma AFFA unudur ki, hər hansı turnirdə futbolçu yetişdirmirlər. Xüsusən də 40-50 günlük yarışda. Futbolçunu klublar yetişdirməlidir. Bunun üçün isə federasiya klublara şərait yaratmalıdır. Federasiya da legioner limitini ləğv edirsə, bu gün Premyer Liqaya yüksələn “Şəfa”nın rəhbər şəxslərindən olan Əfran İsmayılov “yerli futbolçunun istədiyi pula 3 əcnəbi gətirərəm” deyirsə, klublar niyə futbolçu yetişdirsinlər ki?

Bu gün AFFA-nın tutduğu yol klubları futbolçu yetişdirməyə yox, yetişdirməməyə yönəldir. “Bakı”nın dağılmasından sonra ölkənin yeganə normal akademiyası “Qəbələ” pulsuzluqdan bağlanırsa, AFFA da buna biganə qalırsa, hansı futbolçu yetişdirməkdən danışırıq biz? Ölkənin ən yaxşı akademiyasının bağlanmasına sənin tükün də tərpənməsin, sonra da “Sabahın ulduzları”nı bərpa elə ki, mən futbolçu yetişdirirəm. Ola bilər AFFA-dakı bilmirlər deyə bir daha təkrar edirik, hər hansı bir turnirdə futbolçu yetişdirmirlər! Futbolçunu klublar yetişdirməlidir. Əvvəl “Sabahın ulduzları”nda əsas diktə edən tərəf “Bakı”, “İnter” kimi klublar idi. Bu gün o klublar, həmin klubların uşaq futbolu yoxdursa, gündə bir turnir keçir, düzələn deyil. Bir sözlə, bu gün Azərbaycan futbolçu əmin addımlarla geriləyir. Avrokuboklarda yuxarıda müqayisəsini apardığımız nəticələr də son 1 ildə Azərbaycan futbolununun hansı istiqamətdə getdiyini göstərdi. Biz irəli yox, geri gedirik. Özü də əmin addımlarla...

İBRAHİM