Eren Aydın: “Mübarizəni dayandırmağa layiq deyildik”

“Zirə”nin hücumçusu Eren Aydın UEFA Konfrans Liqasının II təsnifat mərhələsində “Payde”yə (Estoniya) qarşı keçirilən cavab oyunundan (1:1) sonra jurnalistlərin suallarını cavablandırıb. Futbolxeber.az saytının əməkdaşının da iştirak etdiyi müsahibəni təqdim edirik:

- Oyunla bağlı nə deyə bilərsiniz?

- Futbolun bu tərəfi çox pisdir. Saysız qol epizodları yaratdıq. Xeyli şansı boşa verdik. İki topumuz da dirəkdən qayıtdı. Top qapıdan keçmək istəmirdi. Səfərdəki oyunda da bu cür halla üzləşmişdik. Çox yaxşı futbol sərgiləsək də, qismətimiz bu imiş. Artıq edə biləcəyimiz bir şey yoxdur. Bundan sonra ölkə çempionatına köklənməliyik.

- Avrokuboklarda “Turan Tovuz” iştirak etməli idi, sonradan onları siz əvəzlədiniz. Demək olar ki, “Zirə” buna hazır deyildi?

- Bir qədər hazırlıqsız yaxalandıq demək olar. Lakin yaxşı təlim-məşq toplanışı keçmişdik. Ötən mövsümlə müqayisədə çox yaxşı futbol sərgilədiyimizi düşünürəm. Rəqibin iki zərbəsi var idi və biri qol oldu. Mübarizəni dayandırmağa layiq deyildik. Buna əminəm. İstənilən halda rəqibi təbrik edirəm. Güclərinə uyğun mübarizə apardılar.

- Əvəzlənməyiniz nə ilə əlaqədar idi? Özünüz istədiyiniz, yoxsa...

- Futboldur bu. Bir qədər ola bilər yorğun idim. Əvəzlənməyim baş məşqçinin qərarı idi və buna hörmətlə yanaşıram.

- Oyunun sonunda top rəqibin əlinə dəysə də, penalti təyin olunmadı. Ümumilikdə hakim idarəçiliyini necə qiymətləndirirsiniz?

- Düşünürəm ki, hakim oyunun əvvəlindən lazım oldu-olmadı fitini səsləndirirdi. Rəqibə toxunan kimi referi fit verirdi. Son epizodda da top dirədəyə dəydiyi üçün hakim əllə oyuna görmədi. Halbuki biz hamımız ehtiyat oyunçular skamyasından topun rəqib futbolçunun əlinə dəydiyini gördük. VAR olmadığı üçün penalti təyin edilmədi. Hakimin qərarına hörmətlə yanaşmaq lazımdır.

- Sizin dirəyə dəyən topunuz qapıdan keçsəydi, hər şey fərqli ola bilərdi?

- Mən həmin epizodda qol olduğunu zənn etdim. Sevinməyə hazırlaşırdım. Lakin sən demə, top qapıdan keçmədi. Təbii ki, qol olsaydı, 2:0 önə keçəcəkdik. Bu da böyük üstünlük demək idi. Ondan başqa da, 2-3 real qol epizodumuz oldu. Təəssüf ki, dəyərləndirə bilmədik.

- Əlavə vaxta, penaltilər seriyasına hazır idiniz?

- Əslində biz məsələni 90 dəqiqədə həll etməyi düşünürdük. Amma olmadı. 1:0 öndə olarkən də xeyli qol epizodunu qaçırdıq. Futbolda belə hallar olur.

- Ölkə çempionatının startına təxminən iki həftə qalıb. Avrokuboklarla erkən vidalaşmağınız komandada psixoloji gərginlik yaratmayacaq?

- Təbii ki, hamımız çox üzgünük. Çünki rəqibi keçəcəyimizə inanırdıq. Bəxtimizə bizdən heç də güclü olmayan rəqib düşmüşdü. Artıq irəli baxmalıyıq. İki həftə vaxtımız var. Bu müddətdə yaxşı çalışmalı və çempionata köklənməliyik. Hədəfimiz çempionatda ilk üçlüyə düşmək olmalıdır. Hamı bunun üçün əlindən gələni etməlidir.