Rəşad Sadıqov: “Mərhələni keçməyə layiq tərəf biz idik”

“Zirə” Konfrans Liqasının ikinci təsnifat mərhələsində mübarizəni dayandırıb.

Futbolxeber.az saytının məlumatına görə, komandanın baş məşqçisi Rəşad Sadıqov "Payde" ilə matçdan sonra keçirilən mətbuat konfransında 1:1-lik heç-heçəni belə şərh edib:

“Bizim üçün oyun barədə uzun-uzadı danışmaq çox çətindir. Məyusedici məğlubiyyət oldu. Mərhələni keçə bilmədik. Hər şey göz qabağındadır. Erkən qol vurduq, çoxsaylı qol epizodları... Bu qədər epizodları istifadə edə bilməmək... İstifadə edə bilməmək deyəndə ki, dirəkdən, rəqib müdafiəçidən, qapıçıdan qayıdır. 3-4 oyuna sığacaq qədər qol epizodu yaratdıq. Təəssüflər olsun ki, top qapıdan keçmək istəmirdi. Belə olan halda da baxırsan ki, çox vaxt məğlub olursan. Bu gün də elə oldu. Gedişat onu göstərirdi ki, qol vura bilməyəcəkdik, rəqib mərhələni keçən tərəf olacaq. Rəqibi təbrik edirəm, növbəti oyunlarda onlara uğurlar arzulayırıq. Hər iki oyuna görə mərhələni keçməyə layiq tərəf biz idik. Amma təəssüflər olsun ki, iki oyundakı çoxsaylı qol epizodlarını, böyük üstünlüyü nəticəyə çevirə bilmədik".