AFFA, bir təbrikə dəymədi?

2 gün əvvəl Azərbaycan minifutbol millisi növbəti dəfə tarix yazdı. Yığmamız Slovakiyada keçirilən Avropa çempionatının qalibi oldu. Bu, millimizin tarixində ikinci Avropa çempionluğudur. Minifutbol millimizin bu uğuru ölkədə 7-dən 77-yə hər kəsi sevindirdi.

Sırf idman tərəfindən yanaşsaq, başda Gənclər və İdman Nazirliyi olmaqla, bir çox idman qurumları sosial şəbəkə hesabları vasitəsi ilə Azərbaycan Minifutbol Federasiyasını, yığmamızı bu tarixi uğur münasibəti ilə təbrik etdilər. Qəribədir ki, bircə AFFA-dan təbrik gəlmədi. Halbuki digər federasiyalardan öncə məhz AFFA minifutbol millimizi təbrik etməli idi.

Bu biganəlik bir çox suallar yaradır. Görəsən, AFFA minifutbol millimizin bu uğuruna paxıllıq edir, yoxsa qısqanır? Çünki bunun başqa adı yoxdur. Necə ola bilər ki, ölkədə futbola cavabdeh olan qurum Avropa çempionu olan minifutbol yığmasını təbrik etməsin? Başa düşürük, neçə gündür futbol millimiz dünya reytinqində 161-ci yerdə olan Malta ilə “ölüm-dirim savaşı”na yox, adi bir yoxlama oyununa hazırlaşırdı. Amma baş nə qədər qarışıq olsa da, bir təbrikə vaxt tapmaq mümkün idi.

Əslində, mən AFFA rəsmilərini Bratislavada keçirilən Avropa çempionatının final matçında görəcəyimizi düşünürdüm. Çünki bir neçə gündür futbol millimiz Avstriyada təlim-məşq toplanışındadır. Yığmamızın məskunlaşdığı yerdən Slovakiya paytaxtına olan məsafə isə maksimum 60-70 km idi. Hər halda sıravi azərbaycanlılar minifutbol millimizi dəstəkləmək üçün 300-400 km məsafə qət edib Avropanın müxtəlif şəhərlərindən "Tipos Arena"ya təşrif buyurursa, AFFA niyə özünə əziyyət verməsin? Lakin AFFA rəsmiləri nəinki özlərinə əziyyət verib Bratislavaya getdilər, quru bir təbriki belə minifutbol millimizə çox gördülər. Təbii ki, Minifutbol Federasiyasının, yığmamızın o təbrikə heç ehtiyacı da yoxdur. Amma necə deyərlər, iş sosiskada deyil, “vnimatelni” olmaqdadır.

Minifutbol millimizə qarşı bu ögey münasibətin adı, səbəbi nədir? Görünür, AFFA artıq minifutbol millimizin uğurlarını həzm edə bilmir və bunu aşkar şəkildə büruzə verməyə başlayıb. Çünki minifutbol millimizin hər uğurundan sonra bu kollektiv futbol yığmamızla müqayisə olunur. Tərəzinin hansı gözünün ağır gəldiyini isə, məncə, deməyə heç ehtiyac da yoxdur. Minifutbol Federasiyasının gördüyü işlər, 4 ildə qazanılan 2 Avropa və 1 dünya çempionluğu AFFA-nın üzünə vurulan sərt şillədir. Bütün bunların müqabilində isə AFFA kinini açıq şəkildə büruzə verir... millimizi təbrik etməməklə...

İBRAHİM