Ayşən Əbdüləzimova: “Hədəf ÇL-in qrupudur”

“İlk setdə həyəcanımız daha çox bilinirdi. Ondan sonra ritmi tutduq və şükürlər olsun ki, 3:0-lıq qələbə qazandıq. Məncə, sevinməyə çox tezdir. İkinci oyun daha vacibdir. Sabahdan həmin matça hazırlaşmalıyıq”.

Futbolxeber.az saytının məlumatına görə, bu sözləri “Turan” voleybol klubunun kapitanı Ayşən Əbdüləzimova CEV Çempionlar Liqasının ilk matçında Tovuzda Xorvatiyanın “Mladost” klubunu məğlub etdikləri (3:0) oyundan sonra deyib.

O, üç setdən ikisində daha çox çətinlik çəkdiklərini bildirib: “Həm son, həm də ilk setdə çətinlik çəkdik. İlk setdə həyəcan, sonuncuda isə arxayınlaşma var idi”.

Kapitan azarkeşlərdən də söz açıb: “Azarkeşlər möhtəşəm idi. Buradan rəhbərliyimizə təşəkkürümü bildirmək istəyirəm. Sağ olsunlar, 3 ay ərzində bizə bu cür şərait yaratdılar. Məncə, bu cür şərait heç bir yerdə yoxdur”.

Voleybolçu hədəfləri barədə bunları söyləyib: “Hədəf ÇL-in qrupudur. Bu gün ilk addımı atdıq. Cavab görüşü daha çətin olacaq. Çünki səfər oyunudur. Hər şey bizdən asılıdır”.