PSJ-də şok itki: 9 ay oynamaya bilər

PSJ-nin hücumçusu Xviça Kvaratsxeliya UEFA Çempionlar Liqasının Liqa mərhələsinin 3-cü turunda “Barselona” ilə matçda (4:2) aldığı zədə səbəbindən 9 ay yaşıl meydanlardan uzaq qala bilər.

Futbolxeber.az saytının məlumatına görə, bu barədə idman fizioterapevti Anxel Vilyanueva sosial şəbəkədə paylaşım edib.

Mütəxəssis gürcüstanlı futbolçunun zədələnmə anını təhlil edərək onun ön çarpaz bağının zədələnməsi ehtimalına diqqət çəkib. O, görüntülərdə sağ diz oynağında qeyri-təbii hərəkətin müşahidə olunduğunu bildirib.

Vilyanuevanın sözlərinə görə, bu cür zədələnmə mexanizmi ön çarpaz və daxili yan bağların zədələnməsi üçün xarakterikdir. Bununla belə, o, görüntülərin keyfiyyəti və çəkiliş bucağı səbəbindən dəqiq biomekanik qiymətləndirmə aparmağın çətin olduğunu da vurğulayıb.

Fizioterapevt futbolçunun bərpa müddətinin 9 ay çəkə biləcəyini qeyd edib.