Azarkeş sayında “Qarabağ” 1-ci, “Neftçi” 2-ci, “Sumqayıt” 3-cü oldu

Azərbaycan Premyer Liqasının 2025/26 mövsümünün oyunlarını 285 min 778 tamaşaçı izləyib.

Futbolxeber.az saytının PFL-ə istinadən verdiyi məlumata görə, nəticəsi ləğv olunan “İmişli” - “Sumqayıt” matçı  nəzərə alınmaqla baş tutan 198 görüşdə orta göstərici 1443-ə bərabər olub.

Ən çox seyrçi XXVIII turun “Qarabağ” - “Sabah” görüşündə qeydə alınıb. Aprelin 18-də Tofiq Bəhramov adına Respublika stadionunda keçirilən qarşılaşmada 17 min 338 izləyici olub.

Bu komandaların eyni arenada baş tutan XXII turdakı matçı siyahıda ikincidir. Martın 1-də baş tutan oyunu 10 min 361 tamaşaçı seyr edib.

Ən çox izləyici toplayan iki matçın ev sahibi olan “Qarabağ” öz meydanındakı matçlardakı tamaşaçı sayında da 1-ci olub. Ümumilikdə 51 min 167 tamaşaçı toplayan Ağdam klubunun orta göstəricisi 3010-a bərabər olub.

“Neftçi” tamaşaçı sayında 2-ci yeri tutub - 44 min 693 (orta göstərici – 2793). İlk “üçlüy”ü “Sumqayıt” qapayıb - 39 min 560 (orta göstərici - 2473)

“Turan Tovuz”ın oyunlarını orta hesabla     2159, “Karvan-Yevlax”da 1611, “Sabah”da 1390, “Şamaxı”da 1068, “Kəpəz”də 822, “Zirə”də 726, “Qəbələ”də 604, “İmişli”də 485, “Araz-Naxçıvan”da isə 219 azarkeş izləyib.