Dambrauskasa verilən “gic-gic suallar”

Son günlər sosial şəbəkələrdə Azərbaycan futbolunun azarkeşləri arasında bir ifadə müzakirə mövzusuna çevrilib: “Dambrauskasa verilən gic-gic suallar”.

Məsələ ondadır ki, “Sabah”ın baş məşqçisi bəzi matçlardan sonra ona verilən sualları bəyənmir və buna sərt şəkildə reaksiya nümayiş etdirir. Çox uzağa getməyək. Elə Azərbaycan Premyer Liqasının sonuncu – 33-cü turunda “Turan Tovuz”a qarşı keçirilən görüşdən sonra “Sabah”ın baş məşqçisinə sual ünvanlanıb ki, "Qarabağ"ın Çempionlar Liqasındakı çıxışının "Sabah"ın Premyer Liqadakı uğurlu performansına təsiri oldu?”

Sual litvalı mütəxəssisin xoşuna gəlməyib və etiraz formasında belə cavab verib: “Bizim stadionumuzda, çempionun, kubokun qalibinin, 33 oyun məğlub olmayan bir komandanın evində bu cür sual verirsiniz. Xahiş edirəm, bizə hörmət edin. Qurban Qurbanov belə ən yaxşı olduğumuzu qeyd edir. Amma siz həmişə bəhanələr axtarırsınız. Bunlar klubumuza, məşqçilərimizə, futbolçularımıza qarşı hörmətsizlikdir. Mövsümü bu notlarla bitirmək istəməzdim. Amma bizə olan hörmətsizlik də qəbuledilməzdir. Titullar qazandığımıza görə üzr istəməyimi istəyirsinizsə, bunu etməyəcəyəm”.

Həqiqətən də jurnalistikadan başı çıxan, anlayışı olan istənilən şəxs təsdiqləyər ki, bu sualda qeyri-adi, loru dildə desək, cırnayası heç nə yoxdur. Sadəcə Dambrauskasın kompleksi var. Ona görə də hər dəfə xoşuna gəlməyən suallara bu şəkildə cavab verir.

Yaxşı olardı ki, azarkeşlər də küyə getməsinlər. Başa düşürük, bu dəqiqə trolların, feyk profillərin, “malalayanların” sayı artıb. Amma bu, heç kimə əsas vermir ki, jurnalistin sualına “gic-gic” adını qoysun. Ümumiyyətlə, bu təyini kim, necə müəyyənləşdirir? Görəsən, sualların hansının “gic-gic”, hansının “ağıllı-ağıllı” olduğu nəyə əsasən bilinir? Dambrauskasın zövqünə görə? Sual xoşdursa, olur “ağıllı-ağıllı”? Görəsən, “Sabah”ın baş məşqçisinin bu vaxta qədər mətbuat konfranslarında, brifinqlərdə, miks-zonalarda verilən suallardan məlumatı var? Uzun illər mətbuatda olanlar təsdiqləyər, bu günə qədər Berti Foqtsdan Qurban Qurbanova, Rəşad Sadıqovdan Samir Abasova qədər sözün həqiqi mənasında gic-gic suallar verilib. Gəl ki, adını çəkdiyim və çəkmədiyim mütəxəssislərin heç biri jurnalistlərin suallarına bu cür sərt formada reaksiya göstərməyiblər. Bəlkə gələn mövsümdən cənab Dambrauskas özü mətbuat konfransı başlamamışdan öncə suallar hazırlasın və jurnalistlərə paylanılsın...

Mən iddia etmirəm ki, mətbuat konfranslarında verilən bütün suallar idealdır. Təbii ki, çatışmazlıqlar mövcuddur və bunu heç kim danmır. Nəinki gənclər, hətta təcrübəli jurnalistlərdən də bəzən anlaşılmaz suallar verən olur. Amma yenə də heç kimin jurnalisti aşağılama, ona “gic-gic suallar verir” deməyə haqqı yoxdur. Görəsən, sabah “Sabah”ın hansısa uğursuz oyunundan sonra jurnalist “Dambrauskasın gic-gic taktikası”, “Dambrauskasın gic-gic əvəzetmələri” kimi ifadələrdən istifadə etsə, litvalı mütəxəssisin xoşuna gələr?..

İBRAHİM