Dəhlizdəki videodan şərhlərdəki trollaradək

“Sabah”ı təbrik edirəm. Bu günlərdə klub Azərbaycan futbolunda yeniliyə imza atdı. Yox, söhbət “Neftçi” kimi ilk dəfə avrokuboklarda qrupa düşməkdən, “Qarabağ” kimi ÇL-də 1/16 finala kimi irəliləməkdən, ölkə xaricinə 5 milyona oyunçu satmaqdan getmir. “Sabah”ın ilki də özü kimi unikaldır. Belə ki, ilk dəfə idi ki, stadionun qapalı məkanından, hamının görə bilmədiyi A zonasından bir klub video paylaşdı.

Gözümü açandan Azərbaycan futbolu ilə yaxından maraqlanıram, amma bu cür hadisə heç yadıma gəlmir. Dırnaq arasında təqdirəlayiq haldır. Məşhur televiziya aparıcılardan biri demişdi ki, əsas müzakirə olunmaqdır, fərqi yoxdur, səni tərifləyirlər, ya söyürlər...

Təbii ki, öz aləmində “Sabah” video paylaşmaqla guya “Qarabağ”dan əvəz çıxır. Axı Ağdam klubu qeyri-etik jest edən “Sabah”ın məşqçisinin videosunu yaymışdı. Əslində isə bu, fərqli məsələlərdir. Birincisi, “Sabah”ın məşqçisi o tərbiyəsizliyi meydanın kənarında, hamının görə bildiyi yerdə etmişdi. İkincisi, guya o video yayımlanmasaydı, Yankoviç cəzasız qalacaq? Onsuz da həmin zonada Peşəkar Futbol Liqasının iki operatoru var idi və baş verənləri lentə alırdılar. Yəni Yankoviçin cəzasız qalma ehtimalı yoxdur.

Üçüncüsü, “Sabah” həmin videonu hansısa sayta deyil, birbaşa çempionatın yayımçı kanalına ötürdü. Bu, həm də “görün mən necə güclüyəm” deməkdir.

Digər tərəfdən isə bundan sonra rəqib komandalar “Bank Respublika Arena”ya necə arxayın yollansınlar? Kim təminat verə bilər ki, sözügedən arenada rəqib komanda üçün ayrılmış paltardəyişmə otağında kamera yoxdur? Yaxud sabah “Neftçi”nin, “Qarabağ”ın, “İmişli”nin və s. paltardəyişmə otağında baş verəcək hər hansı bir hadisəni “Sabah” “CBC Sport”a ötürməyəcək?..

Əslində, mən “Sabah”dan daha bir video gözləyirdim. Amma nədənsə həmin video ortaya çıxmadı. Belə ki, sonuncu “Sabah” - “Qarabağ” matçı günü “Sportinfo”nun əməkdaşı Xanoğlan İmanov "Sabah"ın direktoru Ramin Həsənovun fasilədə hakimlərin otağına gedib, baş hakim Rəvan Həmzəzadəya yüksək tonda "Bizə niyə bu qədər sarı vərəqə verirsən" dediyi barədə paylaşım etmişdi. Maraqlıdır, “Sabah” əgər belə görüntü yayandırsa, bu iddiaya da cavab versin. Bir zəhmət fasilə müddətində hakimlər otağına kimlərin girib-çıxdığını sübut etmək üçün dəhlizin 15 dəqiqəlik görüntülərini paylaşsın da, niyə paylaşmır? Sərf eləmir?

Bir də ki, mən elə bilirdim, Azərbaycan futbolunda ancaq AFFA-nın trolları var. Sən demə, yanılırmışam. “Sabah” da əməlli-başlı trol ordusu yetişdirib. Bəlkə də heç yetişdirməyib e, elə AFFA-nın trollarıdır. Onsuz da bugün Azərbaycan futbolunda AFFA “Sabah”, “Sabah” da AFFA deməkdir. Assosiasiyanın vitse-prezidenti “Sabah”ın “Şamaxı” ilə oyunda qolunu ayaqüstə alqışlayırsa, kimsə əksini iddia etməsin. Amma sözümün mustafası trollardır. Deməli, son günlər “Sabah”ın trol ordusu kifayət qədər fəaldır. Bir jurnalist, futbol adamı, azarkeş status yazmağına peşmandır. Dərhal 20 şərhdən minimum 10-u trol qoxuyur. Adam istəyir lap “Metropoliten”in keçmiş sədri, rəhmətlik adaşım Tağı Əhmədov kimi desin: “Əəə, bir-bir...”

TAĞI