“Turan Tovuz”un növbəti hədəfi – qrup mərhələsi!

"Turan Tovuz"la müqaviləmin uzadılıb-uzadılmaması klubdaxili məsələdir. Burada hər şey məni qane edir. Qərar klub rəhbərinə aiddir". Bu sözləri “Turan Tovuz”un baş məşqçisi Kurban Berdıyev 2 həftə əvvəl demişdi. Əslində hamı başa düşür ki, təcrübəli mütəxəssisin sözləşməsinin yenilənməsi an məsələsidir. Hətta deyilənlərə inansaq, Tovuz klubu avrokuboklara vəsiqəni rəsmiləşdirən kimi, bu qərar açıqlanacaq.

Əlbəttə, başqa necə ola bilərdi ki? “Turan Tovuz” bu gün avrokubokların yollanmağın bir addımlığındadır. Bu isə 32 illik həsrətin sona çatmasıdır. Məlum məsələdir ki, bu cür nəticə havadan yaranmayıb. Məşqçi və rəhbərliyin birgə fəaliyyəti bu uğurlara gətirib çıxarıb. Bu yaxınlarda söhbət etdiyim təcrübəli mütəxəssislərdən biri belə fikir səsləndirmişdi: “Turan Tovuz”un prezidenti məşqçiyə inandı, futbolçuların arxasında durdu. Ona görə də bu gün komanda şəklində uğur var. Görünən odur ki, komandanın daxilində də ab-hava gözəldir, hər kəs bir-birini dəstəkləyir. Ona görə də bu gün qazanılan nəticələr gözlənilməz deyil”.

Əslində, “Turan Tovuz” rəhbərliyi hələ 2 il əvvəl Berdıyevi baş məşqçi postuna dəvət edəndə düzgün addım atmışdı. Buna qədər Kurban Berdıyevin Azərbaycanda çalışması üçün dəfələrlə cəhd edilsə də, alınmamışdı. Məlum məsələdir ki, təcrübəli mütəxəssis ölkəmizə pul üçün gəlməyib. Berdıyev, sağlığına qismət, karyerası ərzində buna qədər böyük pullar qazanıb və yenə də maddiyyatı düşünsəydi, Asiya ölkələrindən birinə yollanardı, Azərbaycana gəlməzdi.

Berdıyevin gəlişindən sonra “Turan Tovuz” adına qısa zamanda böyük işlər görülüb. Klubun idarə heyətinin sədri Ehtiram Quliyev başa düşür ki, müvəqqəti yox, daimi uğurlar qazanmaq üçün infrastruktur mütləqdir. Quliyev daim Berdıyevin fikirlərinə hörmətlə yanaşır, onun zəngin təcrübəsindən yararlanır. Rəhbərlik-məşqçi vəhdəti bu gün öz nəticəsini verir: “Turan Tovuz” Avropanın qapısını döyür və artıq 2 turdan sonra komanda avrokuboklara vəsiqəni rəsmiləşdirə bilər. Yəni “Turan Tovuz” demək olar ki, artıq avrokuboklara yollanmaq tapşırığının öhdəsindən gəlib.

İndi isə irəli baxmaq lazımdır. Berdıyevin karyerasına bələd olanlar, onu yaxından tanıyanlar da təsdiq edir ki, təcrübəli mütəxəssis heç vaxt minimum hədəflər uğrunda yarışmayıb. Çalışdığı klubdan asılı olmayaraq, məşqçinin hədəfi daha irəli getməkdir. Ona görə düşünürük ki, bu gün “Turan Tovuz”un növbəti hədəfi avrokubokların qrup mərhələsi olmalıdır. Hər halda komanda 32 ildən sonra Avropaya 1-2 mərhələ üçün yollanmamalıdır. Rəhbərlik məşqçi üçün lazımi şəraiti yaratmağa davam etsə, Berdıyevin zəngin təcrübəsi bu tapşırığın öhdəsindən gəlməyə imkan verəcək. Həm də o cür təcrübəli mütəxəssis Azərbaycana yalnız avrokuboklara vəsiqə qazanmaq üçün gəlməyib ki...

Bir maraqlı məqam da AFFA ilə bağlıdır. Kurban Berdıyevin ölkəmizdə çalışması kiçik hadisə deyil. Bəs nə üçün bu günə qədər AFFA rəsmiləri rəsmi, yaxud qeyri-rəsmi şəkildə təcrübəli mütəxəssislə görüşüb fikir mübadiləsi aparmayıb? Axı yaxın keçmişdə AFFA rəhbərliyi bütün günü İnkişaf Strategiyasından danışırdı, hər kəsi bu məsələyə qoşulmağa çağırırdı. İstənilən fikir mübadiləsinə hazır olduqlarını açıqlayırdılar. Fikir öyrənmək üçün Berdıyevdən yaxşı kadr? Hər halda “Turan Tovuz”un çalışdırıcısı kifayət qədər böyük təcrübəyə malikdir və Azərbaycan futbolu onun məsləhətlərindən ancaq fayda görər. Belə bir görüş olsaydı, yəqin ki, mətbuat da bundan xəbər tutardı. İndi də gec deyil, AFFA rəhbərliyi Kurban Berdıyevlə Azərbaycan futbolu barədə müzakirə aparsa, bunun heç bir tərəfə ziyanı dəyməz. Yuxarıda da qeyd etdiyimiz kimi, Berdıyev Azərbaycana pul üçün gəlməyib. Məqsəd ölkə futboluna fayda verməkdir. O zaman Azərbaycan futbolu niyə Berdıyevin təcrübəsindən faydalanmasın?

TAĞI