“Sabah” “Qarabağ”dan qisas alır - Zuddasa qarşılıq Yankoviç

“Sabah” və “Qarabağ” arasında keçirilən Azərbaycan kubokunun yarımfinal mərhələsinin cavab oyunundan sonra yaşananlar kriminal türk seriallarını xatırlatdı. Matç başa çatdıqdan sonra qalmaqal, Ağdam klubunun yarımmüdafiəçisi Marko Yankoviçin görüşün baş hakimi Rəvan Həmzəzadəni hədələməsi, referinin ünvanına təhdidedici ifadə səsləndirməsi – bütün bunlardan konkret “Kurtlar Vadisi”nin qoxusu gəlir. Əslində, məsələ bununla bitmiş hesab olunurdu. Gəl ki, dünən “CBC Sport”da yayımlanan, sonradan kanalın sosial şəbəkə hesablarından silinən video olmasaydı...

Qısa zamanda silinsə də, çoxları sözügedən videonu gördü, xeyli yerdə də tirajlandı. Həmin kadrlardan açıq-aşkar görünür ki, monteneqrolu yarımmüdafiəçi nəinki meydanda, hətta stadionun dəhlizində də Rəvan Həmzəzadənin üzərinə hücum çəkir. Tərəflər əlbəyaxa olurlar. Təbii ki, Yankoviçin hərəkətləri yolverilməzdir və o, ən sərt şəkildə cəzalandırılmalıdır. Yayda komandadan gedəcəyini nəzərə alsaq, monteneqrolunu çətin ki, bir də “Qarabağ”ın heyətində görə bilək. Hər halda Markoya veriləcək cəzanın təkcə kuboku deyil, çempionat oyunlarını da əhatə edəcəyini gözləmək olar.

Bütün bunlar öz yerində. Maraqlı məqam başqadır. Necə oldu ki, Yankoviçlə Həmzəzadənin videosu dərhal deyil, oyundan iki gün sonra ortaya çıxdı? Bu məqam tanış gəlir? Dərhal yada Azərbaycan Premyer Liqasının 22-ci turunda keçirilən “Qarabağ” - “Sabah” oyunundan (3:3) sonra yaşananlar yada düşür. Həmin matçda “Sabah”ın məşqçisi Valerio Zuddas “Qarabağ”ın məşqçilər korpusuna qarşı tərbiyəsizlik etsə də, AFFA İntizam Komitəsi tərəfindən cəzalandırılmamışdı. İddia edilmişdi ki, guya matçın AFFA nümayəndəsi bu barədə protokolda qeyd etməyib (Əslində etmişdi, amma indi mövzumuz o deyil). Sonradan Zuddasın etdiyi qeyri-etik jestin videosu mətbuatda yayıldı və bundan sonra əlacsız qalan AFFA məcburən “Sabah”ın məşqçisini cəzalandırdı. Təbii ki, bunu sübut edə bilmərik, lakin məlum məsələdir ki, mətbuata həmin video məhz “Qarabağ” tərəfindən ötürülmüşdü (Hər halda video mətbuatda əvvəldən olsaydı, dərhal yayımlanardı, bir neçə gün sonra yox). Görünən odur ki, indi də “Sabah” “Qarabağ”dan qisas alır. Necə deyərlər, Zuddasa qarşılıq Yankoviç. Hər halda görüntülərdən aşkar görünür ki, Marko Yankoviç və Rəvan Həmzəzadənin əlbəyaxa olması hər hansı jurnalistin telefonuna yox, “Bank Respublika Arena”nın kameralarında düşüb. Belədə əminliklə iddia etmək olar ki, video da məhz klub tərəfindən kanala ötürülüb.

Dediyimiz kimi, bununla “Sabah” bir tərəfdən “Qarabağ”dan qisas alır. Yəni siz video yayımlaya bilirsiniz, biz yox?! İkincisi, məsələnin bu qədər şişməsi “Sabah”a sərf edir. Çünki istər mövsüm boyu, istərsə də son oyunda hakimlərin “Sabah”a kömək etməsi barədə danışanların sayı xeyli artıb. Belədə Yankoviç-Həmzazadə qalmaqalının gündəmi zəbt etməsi hakimlik məsələsini ikinci plana keçirir. Bununla da, “Sabah” bir daşla iki quş vurur. Həm gündəmi dəyişir, həm də “Qarabağ”dan qisas alır...

“Sabah” bu mövsüm əla futbol nümayiş etdirir. Bunu heç kim dana bilməz. Lakin o da həqiqətdir ki, ən çətin vaxtlarda bu komandaya hakim dəstəyi verilib. Bu da istər-istəməz ictimaiyyətdə “Sabah”a qarşı haqlı qıcıq, bəzən hətta nifrət oyadır. Əslində, Rəvan Həmzəzadə və Marko Yankoviç arasında olan qalmaqal da gözlənilən idi. İfaçılar fərqli ola bilər. Lakin hakimlərin “Sabah” sevgisi, haqsızlıqlar artıq çoxunu boğaza yığıb. Bu, nə vaxtsa partlamalı idi. Hələ yaxşı ki, bu “partlayış”ın miqyası daha böyük olmadı. Ümid edək ki, “Bank Respublika Arena”da yaşanan rəzalət hakimlər üçün də dərs olacaq. Bundan sonra bir qədər özlərini yığışdıracaqlar. Mövsüm boyu “Neftçi”nin, “Qarabağ”ın, “Zirə”nin, “Turan Tovuz”, “Sumqayıt”, “Araz-Naxçıvan”ın haqqını yediniz, yetər artıq. Futbolçuların, məşqçilərin, klub əməkdaşlarının haqqına girdiniz, çörəklərinə bais oldunuz, lakin kifayətdir. Mövsüm boyu çıxmadığınız hoqqa qalmadı, heç olmasa son 5 turda, mövsümün ən həlledici məqamında ədalətli olun!

İBRAHİM