Syomin: “Qəbələ” akademiyası bağlanırsa, Azərbaycan futbolu necə inkişaf edəcək?”

Tanınmış rusiyalı mütəxəssis, “Qəbələ”nin keçmiş baş məşqçisi Yuri Syominin Futbolxeber.az saytına müsahibəsi

- Bu yaxınlarda Bakıya gələcəyiniz gözlənilirdi. Səfərinizin baş tutmasına nə mane oldu?

- Bakıya “Qarabağ”ın oyunu üçün gəlmək istəyirdim. Planımda komandanın Çempionlar Liqasındakı matçına canlı baxmaq var idi. Lakin müəyyən səbəblərdən səfər baş tutmadı. İstənilən halda “Qarabağ”ın çıxışını çox diqqətlə izləyirdim.

- Ağdam klubunun Çempionlar Liqasındakı çıxışını necə qiymətləndirirsiniz?

- Möhtəşəm. Çox layiqli şəkildə mübarizə apardılar. Rəqiblər güclü olsa da, “Qarabağ” inanılmaz dərəcədə yaxşı çıxış etdi. Komandanın nəticələri ildən ilə daha da yaxşılaşır. Təbii ki, bunda Qurban Qurbanovun böyük rolu var. O, çox uğurlu məşqçidir.

- Bu günlərdə sabiq klubunuz “Qəbələ” ölkə çempionatları tarixində ən ağır məğlubiyyətlərindən birini aldı. 1:7 hesabını necə qarşıladınız?

- Bu nəticəyə görə çox təəssüflənirəm. Qəbələdə çox yaxşı infrastruktur, şərait var. Oradan çox xoş təəssüratlarım qalıb. “Qəbələ” kimi klubda çalışmaq mənə çox xoş idi. Rayonun insanları da çox mehriban, istiqanlı idilər. İnanıram ki, “Qəbələ” yenidən Premyer Liqadan düşməyəcək. Bu komandanı itirmək olmaz. Meydanlar əladır. Akademiyada nə qədər uşaq futbolla məşğul olur.

- “Qəbələ” akademiyası artıq bir neçə aydır maliyyə çatışmazlığı səbəbindən fəaliyyətini dayandırıb...

- Təəssüf... Bunu bilmirdim. Çox heyif... Təəssüflənirəm. Mən “Qəbələ”də çalışarkən rayonda hamı uşaqlarını ora məşqə gətirirdi. “Qəbələ”ni itirmək olmaz.

- Sizin də çox yaxından tanıdığınız Kurban Berdıyevin “Turan Tovuz”dakı fəaliyyətini necə qiymətləndirirsiniz?

- Kurban Berdıyev qalib məşqçidir. O, hər zaman nəsə qazanır. Berdıyev çox təhlükəlidir (gülür). O, elə “Qarabağ” üçün də təhlükəli rəqibdir. Berdıyevin təcrübəsi barədə nəsə demək artıq olar. Qalib gəlməyin yollarını bilir. Azərbaycanda medalçılar sırasına düşsə, yaxud kuboku qazansa, buna qətiyyən təəccüblənmərəm. Çünki nə etdiyini, eləcə də qalib gəlməyin yollarını bilir.

- Lakin nəticələrin yaxşı olmasına baxmayaraq, bəzən Berdıyevin komandasını baxımlı futbol oynamamaqda ittiham edənlər var. Bu fikrə münasibətiniz necədir?

- Kurban Berdıyevin bu gün ölkənizdə çalışması yalnız və yalnız Azərbaycan futbolunun xeyrinədir. Onun zəngin təcrübəsindən yararlanmaq lazımdır. Berdıyev “Nou Kamp”da “Barselona”ya, Qvardiolaya qalib gəlmiş məşqçidir. Görünür, həmin tənqidçilər bu haqda məlumatsızdılar (gülür). Ümumiyyətlə, baxımlı futbol anlayışı da fərqlidir. Hərə məsələyə bir cür yanaşır. Futbolda əsas olan nəticədir. Nəticə varsa, digər məsələlər arxa plana keçir. Üstəlik, mən Berdıyevin komandasının, eləcə də digər klubların büdcəsi haqda məlumatsızam. Müasir futbolda klubun büdcəsindən də çox şey asılıdır.

- Ölkəmizdə çalışmısınız, Azərbaycan futboluna yaxından bələdsiniz. Sizcə, niyə milli səviyyəsində uğur qazana bilmirik? Problem nədədir?

- “Qəbələ”nin akademiyası bağlanırsa, Azərbaycan futbolu necə inkişaf edəcək? Uşaq futboluna diqqət yetirmək lazımdır. Hər şey aşağıdan başlayır. Dayanmadan işləmək lazımdır. Bu halda nəticə qazanmaq da mümkün olacaq.