Yuri Vernidubdan qələbə şərhi

"Azarkeşlərimizə təşəkkür etmək istəyirəm. Maraqlı oyun alındı. "Qəbələ" uduzmağına baxmayaraq, onların oyunu mənim xoşuma gəlir. Hakimliklə bağlı onu deyə bilərəm ki, bu cür davam edərsə hər şey yaxşı olacaq. Qəbələdə çox gözəl futbol mərkəzi var. Stadion superdir. Məşq üçün də çox gözəl meydançaları var”.

Futbolxeber.az saytının məlumatına görə, bu sözləri “Neftçi”nin baş məşqçisi Yuri Vernidub Azərbaycan Premyer Liqasının 24-cü turunda “Qəbələ”ni 3:1 hesabl ilə məğlub etdikləri oyundan sonra deyib.

Ukraynalı mütəxəssis komandasının avrokuboklara vəsiqə uğrunda mübarizəsinə belə münasibət bildirib: “Avrokuboklara getməməyimiz faciə yox, xoşagəlməz hadisə olar. Bir neçə namizəd var. Əlimizdən gələni edəcəyik. Hələ 9 tur qalıb. Uğur bizim əl, ayaq və bədənimizdən asılıdır”.

Ötən turda keçirilən "Turan Tovuz"la matçdan sonra rəqibin baş məşqçisi Kurban Berdıyevlə görüşməsindən sonra Ukrayna mətbuatında xoş qarşılanmamasından da söz açan Vernidub məsələyə belə yanaşıb: "Yazılanlar mənə maraqlı deyil. Bilmirəm, Berdıyevin neçə pasportu var. Bildiyim qədərilə o, türkməndir. Şəkillərdə nə qoyduğunu da bilmirdim. Qısası, müharibənin ilk günündə necə idimsə, indi də eləyəm. Kimlər ki, bu barədə yazırlar, desinlər görək dörd il ərzində nə ediblər? Mənim 60 yaşım var, nə qədər istəyirlər təxribata cəlb etsinlər. Mən futboldayam və işimə davam edirəm”.