Emil Mustafayev: “Sumqayıt”ın avrokuboklara yollanmaq şansı az deyil”

“Sumqayıt”ın yeni transferlərindən olan Emil Mustafayevin Futbolxeber.az saytına müsahibəsi

- “Turan Tovuz”la oyunda “Sumqayıt”ın heyətində debüt etdiniz. Təəssüratlarınız necədir?

- “Sumqayıt”da debüt etdiyim üçün çox şadam. Çoxdandır meydana çıxmırdım. Yenidən böyük futbol həyəcanı yaşamaq sevindiricidir. Sadəcə ona təəssüflənirəm ki, ilk matç uğursuz alındı və uduzduq.

- 1:2 hesablı məğlubiyyətə səbəb nə oldu?

- Məncə, minimum meydandan 1 xalla ayrılmalı idik. Bəxtimiz gətirmədi. Rəqibin isə əksinə, bəxti gətirdi. Ümumilikdə komanda olaraq meydanda pis görsənmirdik. Sadəcə bəzi epizodlarda qol vurmaq lazım idi.

- İkinci hissədə “Sumqayıt” üstünlüyü ələ alsa da, məğlubiyyətdən qaçmaq mümkün olmadı...

- Şanslarımız çox oldu. Təəssüf ki, onlardan yararlana bilmədik. Halbuki epizodları dəyərləndirsəydik, ən pis halda heç-heçə olardı.

- Ümumiyyətlə, “Sumqayıt”a gəlişiniz necə alındı?

- Klublar arasında danışıq getdi. Əslində keçid daha əvvəl baş tutmalı idi. Lakin müəyyən  səbəblərdən gecikmə oldu. Nəhayət ki, “Sumqayıt”a gəlişim alındı və buna görə çox məmnunam.

- Azərbaycan Premyer Liqasına nə dərəcədə bələdsiniz?

- Bütün komandaları tanıyıram. Rəqiblərin hamısı haqda məlumatım var. “Sumqayıt”ın da potensialına bələdəm. Çempionatın səviyyəsi yaxşıdır. Daha əvvəl bir çox oyunları izləmək imkanım olub. 

- Sizcə, “Sumqayıt” cari mövsüm nəyə nail ola bilər?

- “Sumqayıt” avrokuboklarda uğrunda mübarizə apara bilər. Məncə, ilk dördlükdə olmaq mümkündür. Komandanın Avropaya yollanmaq şansı heç də az deyil.

- “Turan Tovuz”a məğlubiyyət fikrinizi dəyişmədi?

- Xeyr. Şans var. Bu, sadəcə ilin ilk oyunu idi. Mövsümün hələ yarısı geridə qalıb.

- “Sumqayıt”a transferiniz milliyə yolunuzu aça bilər?

- “Sumqayıt”ı seçməyimin səbəblərindən biri də budur. Məncə, indi daha çox göz önündə olacağam. Azərbaycan millisində çıxış etmək mənim üçün fəxrdir. Yenidən o formanı geymək istəyirəm. Düşünürəm ki, “Sumqayıt”da özümü yaxşı tərəfdən göstərməklə yenidən yığmaya dəvət ala bilərəm. Qarşımdakı əsas hədəflərdən biri də məhz budur.

Fərəc Aslanov