Bədavi Hüseynov – gənclər üçün əsl nümunə!

Dünən “Qarabağ” 2026-cı ildə ölkə çempionatındakı ilk oyununda “Kəpəz”ə uduzdu. Əslində, 0:2 hesablı məğlubiyyət barədə danışılası çox şey yoxdur. Ağdam klubu 90 dəqiqə boyunca rəqib qapısı qarşısında bir real qol epizodu belə yarada bilmədi. Belədə məğlubiyyət qaçılmaz idi. “Kəpəz”in dünənki qəhrəmanlığı bir yana, 90 dəqiqə boyunca mənim ən çox diqqətimi çəkən Bədavi Hüseynovun oyunu oldu. “Qarabağ”ın müdafiəçisi döyüşkənliyi ilə bir daha həm kapitan sarğısını daşımağa layiq olduğunu sübuta yetirdi, həm də göstərdi ki, futbolda yaş heç də həlledici rol oynamır. 35 yaşı olmasına baxmayaraq, Bədavi dünən meydanda 30 yaşlı Abbas Hüseynovdan da, 27 yaşlı Dani Boltdan da, 25 yaşlı Toral Bayramovdan da, 26 yaşlı Aleksey Kaşukdan da daha çox vuruşdu, daha çox can qoydu. Hələ mən daha gənc olan Addaini, Nərimanı demirəm. Heç şübhəsiz, dünən “Qarabağ”ın ən yaxşısı məhz Bədavi idi. Təbii ki, kimsə razılaşmaya, uduzan komandanın mərkəz müdafiəçisinin ən yaxşı olmasını qəbul etməyə bilər. Fikirlər müxtəlifdir. Amma mənim üçün Bədavi Hüseynovun dünənki çalışqanlığı gənclərə əsl nümunə idi.

Bədavi uzun illərdir “Qarabağ”da çıxış edir. Komanda ilə ölkə daxilində mümkün olan bütün titulları qazanıb. Özü də dəfələrlə. Çempionlar Liqasının, Avropa Liqasının, Konfrans Liqasının qrupunda oynayıb, pley-off görüb. Onun “Braqa” ilə matçın 120-ci dəqiqəsində Nəriman Axundzadəyə verdiyi ötürmə hələ də yaddaşlardan silinməyib. Bədavinin yerində başqası olsaydı, bəlkə də çoxdan futboldan doymuşdu. “Qarabağ”da ildə 1-2 oyuna çıxar, pulunu qazanardı. Ya da karyerasını başa vurub Ağdam klubunun aşağı yaş qruplarında məşqçiliyə başlayardı. Lakin Hüseynovun əzmi, xarakteri bu gün də meydana çıxmağa imkan verir. Dünənki mübarizliyi ilə isə o, hələ də meydana çıxmağa layiq olduğunu sübuta yetirdi.

Bu yaxınlarda “Futbolxeber”ə müsahibəsi zamanı Bədavi Hüseynov karyerasını mövsümün sonunda başa vurmaq barədə düşünmədiyini bildirdi. Təcrübəli müdafiəçi qeyd etdi ki, yayda baş məşqçi Qurban Qurbanovla bu barədə söhbəti olacaq. Hüseynovun sözlərində inam var idi. O, həm komandaya hələ də fayda verəcək gücdə olduğuna, həm də Qurban Qurbanovun ona ən azı daha bir il şans verəcəyinə inanır. Məncə, dünənki matç bir daha sübut etdi ki, Hüseynovun sözlərində həqiqət var. Onun oyunu ilə özünəinamı üst-üstə düşür. Bir sözlə, təkcə elə dünənki əzmkarlığı, döyüşkənliyi, mübarizliyi təcrübəli müdafiəçinin ən azı daha bir il oynamalı olduğunu təsdiqlədi...

İbrahim Cəfərov