Yaşar Seyidov: “Elə problemlər yaradırlar ki, heç şeytanın da ağlına gəlməz”

"Ötən gün "Sabah" və "Araz-Naxçıvan"ın oyunlarını ürək ağrısı ilə izlədim. Sözün düzü, "Sabah"ın birinci oyunundan sonra cavab qarşılaşmasında daha yaxşı çıxış edəcəyinə ümid edirdim. Çox təəssüf ki, hər iki komandamız məğlub olaraq avrokuboklarda mübarizəni dayandırdı".

Futbolxeber.az saytının məlumatına görə, bu sözləri Sport24.az-a açıqlamasında Yaşar Seyidov deyib.

Hazırda II Liqada mübarizə aparan "Dinamo"nun İdarə Heyətinin rəhbəri klublarımızın Konfrans Liqsında yaşadığı uğursuzluqla bağlı fikirlərini bölüşüb: "Avrokuboklarda "Qarabağ"dan başqa klubumuzun olmaması? Bunun dəqiq səbəbini bilirəm, amma üzürlü sayın, bu barədə danışmayacam. Gizlətmirəm, düzünü deyəndə "Dinamo"ya böyük problemlər yaradırlar. İndiki məqamda susmaq daha məqsədəuyğundur. Hər kəsə hər şey məlimdur. Görünən kəndə nə bələdçi? Elə problemlər yaradırlar ki, heç şeytanın da ağlına gəlməz. Azərbaycan futboluna ömrümün yarısını vicdanla, namusla xidmət edən biri olaraq bu haqda danışmaq istəmirəm. Dövlətin ayırdığı vəsaiti sağa-sola, lazımsız legionerlərə xərcləyənlər söz sahibi olub. Onlar məsuliyyətini başa düşərək hesabat versinlər. Mən "Dinamo" üçün AFFA və FİF-dan aylıq aldığım 5-10 min manatın hesabatını 10 yerə verirəm. Bu kiçik məbləğlə Bakı və ətraf kəndlərdən uşaqları və gəncləri bir yerə yığaraq 10 komanda ilə çempionatda çıxış edirəm. Nə qədər pis vərdişlərdən uzaqlaşdırıb, sağlam tərbiyə edərək futbola gətirmişəm. Bunları sponsorsuz, heç bir kömək olmadan edirəm. Başqa komandalara 500 yüz min manat pul verilir. Bir az da danışsam, "Dinamo"nun çempionatda iştirakı sual altında olacaq".

Qeyd edək ki, "Sabah" və "Araz-Naxçıvan" UEFA Konfrans Liqasında mübarizəni dayandırıb. Bakı təmsilçisi evdə Bolqarıstanın "Levski" (Sofiya) komandasına 0:2 (ilk oyun - 0:1), Naxçıvan klubu Kiprdə "Omoniya"ya 0:5 (ilk oyun - 0:4) hesabı ilə yenilib.