Klublarımız üçün Avropa: bir pley-off qədər uzaq

"Qarabağ” yenə meydanda tək qaldı. “Zirə”nin ardınca “Sabah” və “Araz-Naxçıvan”ın da Avropa macərası qısa çəkdi. Naxçıvan klubu hələ ilk oyundan sonra Konfrans Liqası ilə sağollaşacağının “anonsunu vermişdi”. Ona görə də “Qarabağ”ın Avropada tək qalmaması üçün bütün ümid “Sabah”a idi. Gəl ki, paytaxt təmsilçisi növbəti dəfə sübut etdi ki, ona güvənmək, inanmaq, ümid etmək səhvdir.

Mövsüm ərzində 25-30 milyon pul xərcləyən, deyilənə görə prezidenti ayda 30 min (!!!), icraçı direktoru isə 15 min (!!!) maaş alan klub Konfrans Liqasında pley-offa belə yüksələ bilmədi. “Sabah”ın gücü yalnız özündən qat-qat zəif Moldova klubunu üstələməyə çatdı. Belə çıxır ki, o boyda pul "Petrokub"u keçmək üçün xərclənmişdi? Təbii ki, yox. Bu zaman ortaya sual çıxır? Bəs “Sabah”ın problemi nədədir? Əlbəttə ki, idarəçilikdə. Bu haqda daha əvvəllər də yazmışıq. Əgər bir kluba illərlə on milyonlar xərclənirsə, əcnəbi baş məşqçilərin biri digərini əvəzləyirsə, hər il komanda 10-15 legioner transfer edirsə və bütün bunların qarşılığında nəticə yoxdursa, deməli, problem idarəçilikdədir. Heyif "Sabah"ın sponsorlarının pullarından. Bir Moldova klubunu keçmək üçün ildə 30 milyon xərcləməyə dəyməz, vallah dəyməz. Yarandığı gündən bu günə qədər kluba 100 milyondan çox pul xərclənib. Lakin o məbləğin qarşılığında “Sabah” qrup mərhələsi bir yana, avrokuboklarda heç pley-off üzü də görməyib. Bu, sadəcə fiaskodur.

“Sabah”ın bacarmadığını bacaran, yəni UEFA Konfrans Liqasında oynayacaq klubların bəzilərinə diqqət yetirək: “Differdanj” (Lüksemburq), “Neman” (Belarus), “Dinamo Tirana” (Albaniya), “Linfild”, “Şemrok Rovers” (hər ikisi İrlandiya), “Virtus” (San Marino), “Breydablik” (İslandiya), “Drita” (Kosova), “Hamrun” (Malta). Bəzilərinə hətta adamın peşəkar klub deməyə belə dili gəlmir. Gəl ki, artıq Konfrans Liqasının pley-offundadırlar. Nəinki yuxarıdakı 9 klub, hətta Avroliqada pley-offa yüksəlməklə avtomatik olaraq Konfrans Liqasının Liqa mərhələsini təmin edən “Linkoln” (Cəbəllütariq), “Kups” (Finlandiya) və “Zrinski”ni (Bosniya və Hersoqovina) də bir yerə yığsaq, 12 klubun büdcəsinin cəmi “Sabah”, “Zirə” və “Araz-Naxçıvan”a ötən il xərclənən puldan daha az gələr. Gör necə vəziyyətdir ki, Cəbəllütariq klubu Konfrans Liqasının qrupunda, San Marino və Malta təmsilçiləri isə pley-offda oynayacaq. Azərbaycanın isə 3 klubundan birinin də pley-offa yüksəlməyə cürəti çatmadı. Gəl ki, 3 gündən sonra “İmişli”ni, “Karvan”ı udub şirə dönəcəklər...

İbrahim Cəfərov