Bəhlul Mustafazadə: “İnanın, çox çalışırıq ki, bu vəziyyətdən çıxaq”

Milli komandamızın müdafiəçisi Bəhlul Mustafazadənin Futbolxeber.az saytına müsahibəsi

- Yoxlama oyununda Macarıstana məğlub oldunuz. Görüşü necə şərh edərdiniz?

- Qarışıq oyun idi. Sonda heç-heçəyə çox yaxın idik. Digər tərəfdən isə görüşə heç də yaxşı başlamamışdıq. Qapımızda erkən qol gördük. Sonra hesabı bərabərləşdik. Ardınca rəqib ikinci qolu vurdu. Fasilədən sonra daha yaxşı oynadıq. Qol vurmaq üçün epizodlarımız oldu. Təəssüf ki, onlardan yararalana bilmədik. Macarıstan yaxşı komandadır.

- Mövsümün sonu olduğunu və 3 gün qabaq səfərdə Latviya ilə qarşılaşdığınızı nəzərə alsaq, yorğunluq var idi?

- İstər-istəməz yorğunluq olur. Qeyd etdiyiniz kimi, mövsümün sonudur. Üstəlik, Latviya ilə oyun keçirmişdik. Buna baxmayaraq, çalışdıq yaxşı çıxış edək, hesabı bərabərləşdirək. Təbii ki, şans olsaydı, qələbə qazanmaq istərdik.

- Qələbəsiz oyunlar seriyası 10-a çatdı. Millimiz azarkeşləri nə vaxt sevindirəcək?

- Komanda olaraq çox məyusuq. İnanın, çox çalışırıq ki, bu vəziyyətdən çıxaq. Uduzduğumuz üçün üzülürük.

- Son bir ildə qələbə üzünə həsrət qalan millimizdən DÇ-2026-nın seçmə mərhələsində nə gözləmək olar?

- Son iki oyunu götürsək, heç də pis çıxış etmədik. Müsbət məqamlar var idi. Yenə də artırmaq lazımdır.

- Nəzərə alaq ki, qarşıdakı rəqiblərimiz Estoniya, yaxud Latviya deyil, Fransa, Ukrayna və İslandiyadır...

- Bəli, rəqiblər güclüdür. Amma meydana çıxıb tam gücümüzü ortaya qoymalıyıq. Əlimizdən gələni edəcəyik ki, layiqli mübarizə aparaq.

İbrahim Cəfərov