Dünən “zero” təkcə pivə deyildi

AFFA səfər oyunlarına əməkdaşlıq etdiyi, özünə yaxın bildiyi media nümayəndələrini apardığı üçün son zamanlar milli komandamızın oyunlarını canlı izləmək qismət olmurdu. Dünən Macarıstana qarşı matç bu baxımdan yerinə düşdü. Həm də bu, milli komandamızın heç də xoş perspektiv vəd etməyən DÇ-2026-nın seçmə mərhələsi öncəsi son sınağı idi. Odur ki, fursəti qaçırmaq olmazdı...

STADİON, YOXSA PAB?

Arenaya daxil olanda ilk diqqətimizi çəkən milli komandamızın sponsoru olan “Xırdalan 0.0”, yaxud loru dildə desək, “Xırdalan Zero”nun çətirləri oldu. Məlum oldu ki, arenada spirtsiz pivə pulsuzdur. İstənilən şəxs yaxınlaşıb plastik bakallarda “Xırdalan 0.0”ın dadına baxa bilər. Hətta bu cür plastik bakallar media tribunasına da “yol tapmışdı”. Spirtli, yaxud spirtsiz pivəyə qarşı deyilik. Yeri gələndə özümüz də dadına baxırıq, lakin spirtli və ya spirtsiz pivənin media sektora ayaq açması heç də xoş mənzərə deyil. Bəli, Avropanın bir çox stadionunda jurnalistlər spirtli pivə də qəbul edirlər. Lakin qidalanmaq üçün ayrılmış ərazidə, media sektorda deyil...

HƏMİŞƏKİ MİLLİ

Gördüklərimizə əsasən deyə bilərik ki, milli komandamızda hər hansı dəyişiklik yoxdur. Yenə də həmin aciz komandadır. Düzdür, dünən sonda fərqlənmək mümkün olsaydı, millimiz meydandan heç-heçə ilə ayrıla bilərdi. Lakin guya hesab 1:2 yox, 2:2 olsaydı, böyük ölçüdə nə dəyişəcəkdi ki? Fakt budur ki, macarlar meydanda istədiklərini edirdilər. Bəzən rəqib futbolçuların möhtəşəm hərəkətlərini görərkən düşünürdük ki, bu, hələ Macarıstandır. Gör Fransa nə hoqqa verəcək... Macarıstan 90 dəqiqə ərzində qapımıza 25 zərbə endirirsə, Fransa ilə matçda Tanrı köməyimiz olsun...

UTANMASAN OYNAMAĞA NƏ VAR Kİ...

“Futbolda bəxt də lazımdır. Son iki oyunda futbolçulardan razı qaldım. İnkişaf etdilər”. Bunu isə macarlarla oyundan sonra milli komandamızın baş məşqçisi Fernandu Santuş deyib. Portuqaliyalı yenə öz ampluasındadır. Hansı bəxtdən danışırsınız, cənab Santuş? Hamı gördü ki, Renat Dadaşov topu Macarıstanın qapısından keçirməmişdən öncə əllə oynamışdı və oyunda VAR sistemi olsaydı, millimizin qolu ləğv olunacaqdı. Ümumiyyətlə, hansı inkişafdan söhbət gedir? İki oyuna inkişaf olur? Dünya reytinqində bizdən də geridə olan (139-cu yerdə) Latviya ilə heç-heçəni, macarlara minimal hesablı məğlubiyyəti inkişaf hesab etmək üçün yüngül formada desək, ən yaxşı halda sadəlövh olmalısan...

HARDASAN, AY DE BYAZİ, HARDASAN, AY ARİF ƏSƏDOV?

Əslində, günah sizdə deyil, mister Santuş. Düz edib bizi barmağınıza dolayır, nağıl danışırsınız... Günah sizə milyonlar yedizdirən AFFA rəhbərliyindədir. Ardıcıl 5 oyunda qələbə qazanan De Byazini bəyənməyənlər, Arif Əsədova ağız büzənlərə bu da azdır. Portuqaliyalının rəhbərliyi altında Azərbaycan millisinin qələbəsiz oyunlar seriyası artıq 10-a çatıb. Nəzərə alsaq ki, qarşıdakı seçmə mərhələdə millimizin rəqibləri Fransa, Ukrayna və İslandiyadır, belədə nəinki qələbə, heç heç-heçəyə belə ümid yoxdur. Odur ki, tezliklə 10-u 20 əvəzləsə, təəccüblənmərik. Pessimist deyilik, sadəcə millinin göstərdiyi futbol (əgər meydandakı oyuna futbol demək mümkündüsə) belə düşünməyə əsas verir.

Bu gün milli komandamızın sonuncu qələbəsindən düz 1 il ötür. Azərbaycan yığması sonuncu dəfə 2024-cü ilin 11 iyununda Qazaxıstan üzərində 3:2 hesablı qələbə qazanıb. Arif Əsədovun rəhbərliyi altında. Əsədovu məşqçi kimi bəyənməyib əvəzinə Santuşa milyonlar sərf edənlərin son bir ildə AFFA-dakı işi elə milli komandamızın qələbə sayına bərabərdir - “zero”!

PALTARDƏYİŞMƏ OTAĞINDAN DA “KƏNARDA QALAN” SƏRXAN HACIYEV  

Dünən bir də diqqətimi çəkən AFFA-nın, millinin heyətinin “genişlənməsi” oldu. Əvvəl assosiasiyada 1-2 nəfərin gördüyü işi indi 7-8 nəfər görür. Necə deyərlər, “nəzarətə nəzarət”. Qəribəsi odur ki, kimin hansı işi gördüyü də bilinmir. Necə deyərlər, çoxluq heç də həmişə faydalı olmur. Hərə boynuna bir bəcik taxıb, əlinə alıb telefon, düşüb ortaya... Oyundan sonra AFFA-nın baş katibi Cahangir Fərəcullayev milli komandamızın paltardəyişmə otağına yollandı. Nədənsə icraçı vitse-prezident Sərxan Hacıyev yanında deyildi. Belə görünür ki, bir neçə gün əvvəl ölkə kubokunun finalından sonra mükafatlandırma mərasimini stadionun kənarından izləyən Sərxan bəyin artıq paltardəyişmə otağına da girişinə qadağa qoyulub...

İBRAHİM