“Neftçi”nin sabiq futbolçusu: “Macarıstan yığması qələbə qazanacaq”

“Məncə, Macarıstan yığması bu matçda qələbə qazanacaq. Ancaq düşünürəm ki, bu, heç də asan olmayacaq. Yenə də seçmə mərhələyə yaxşı hazırlaşmaq baxımından Macarıstan millisi bu görüşdə qələbə qazanmalıdır”.

Futbolxeber.az saytının məlumatına görə, bu sözləri “Neftçi”nin sabiq futbolçusu Mark Tamaş bu gün Azərbaycan və Macarıstan arasında keçiriləcək yoldaşlıq görüşündə şansları dəyərləndirərkən deyib.

Azərbaycan çempionatlarında çıxış etmiş yeganə macarıstanlı futbolçu olan Tamaş AFFA-nın mətbuat xidmətinə açıqlamasında Azərbaycan millisinin əsas üstünlüyünü də açıqlayıb: “Millinizin əksər oyunçuları daxili çempionatda çıxış edir və demək olar ki, eyni komandada oynayırlar. Belədə futbolçular bir-birilərini daha yaxşı tanıyırlar. Bu da Azərbaycan millisinin əsas üstünlüyüdür. Emin Mahmudovla “Neftçi”də komanda yoldaşı olmuşam. Mahiri isə Polşadan tanıyıram. Mən 2020-2022-ci illərdə orada “Slask” klubunda çıxış edirdim. Mahir də həmin vaxt qısa müddət “Legiya”nın formasını geyinmişdi. Hər ikisi olduqca keyfiyyətli futbolçulardır".

Hazırda Rumıniyanın “Sepsi” klubunda çıxış edən 31 yaşlı müdafiəçi Macarıstan millisinin güclü kollektivdən formalaşdığını deyib: “Əsas “silah”ları baş məşqçinin illərdir qurduğu komanda ruhudur. Əksər futbolçular Top-5 liqalarda çıxış edirlər. Həmçinin Dominik Soboslay kimi kapitanımız var".

O, Azərbaycan paytaxtı haqqında təəssüratlarını da bölüşüb: “Bakı möhtəşəm şəhərdir. Vaxtımız olanda hələ də dostlarımızı görmək üçün ora gəlirik. Ailəm də bir neçə həftə əvvəl Bakıda idi”.

Qeyd edək ki, Azərbaycan - Macarıstan matçı bu gün "Liv Bona Dea Arena"da saat 20:00-da start götürəcək.