Elvir Boliç: “Bakıda insanların məni tanımasına təəccübləndim”

Bosniya və Hersoqovina futbolunun canlı əfsanəsi Elvir Boliçin Futbolxeber.az saytına müsahibəsi

- Sizi Bakıda keçirilən minifutbol üzrə dünya çempionatında görmək xoş sürpriz oldu.

- Təşəkkür edirəm. Minifutbol üzrə Bosniya və Hersoqovina millisinin direktoruyam. Komandaya dəstək olmaq üçün buradayam. Həm də mənim şirkətim minifutbol millisinin sponsorlarından biridir.

- Vaxtı ilə böyük klublarda oynamısınız, tanınmış futbolçusunuz. Bakıda insanlar sizi tanıyırmı?

- 20-25 il əvvəl futbol oynasam da, hələ də tanıyanlar var. Restoranda, oteldə insanların məni tanıması təəccübümə səbəb oldu.

- Çünki Azərbaycanda Türkiyə futbolu çox sevilir, “Fənərbaxça”nın da azarkeşləri çoxdur...

- Bəli, bunu bilmirdim (gülür). Dediyim kimi, insanların Bakıda məni tanıması xoş sürpriz oldu. Gördüyüm qədər ilə Azərbaycan və Türkiyə çox yaxındır. Oteldə televizorda da türk kanalları var idi.

- “Qalatasaray”da qısa müddət oynasanız da, əsas uğurlarınız “Fənərbaxça” ilə bağlıdır. Sizcə, İstanbul klubunun son illərdəki uğursuzluğu nədən irəli gəlir?

- Bunu demək çox çətindir. Bəli, “Qalatasaray” son illər dominantlıq edir. Onları zirvədən salmaq heç də asan deyil. Futbolda belədir, bir dönəm elə olur, sonrakı dönəm başqa cür. İnanıram ki, tezliklə “Fənərbaxça” böyük uğurlara imza atacaq. Lakin bu, heç də asan başa gəlməyəcək.

- Futbolçu karyeranızı bitirdikdən sonra qısa müdət Bosniya və Hersoqovina millisində məşqçi kimi çalışsanız da, sonradan bunun ardı gəlmədi. Niyə məşqçi kimi fəaliyyət göstərmək istəmədiniz?

- Dediyiniz kimi, daha sonra məşqçi kimi çalışmadım. Bir qədər ailəmə daha çox vaxt ayırmaq istədim. Məşqçi işi çox çətindir. Amma futboldan tam kənar olduğumu söyləməzdim. Yerli birinciliyi, Türkiyə, İspaniya çempionatlarını yaxından izləyirəm. Oğlum da futbol oynamağa başlayıb.

- Son illər dünya futbolunda fantastik pullar dövr edir. Oyunçulara 100, 150, 200 milyon dollar ödənilir. Elvir Boliç indiki dövrdə futbol oynasaydı, transfer dəyəri nə qədər olardı?

- Çox fərqli olardı (gülür). Yadımdadır, “Fənərbaxça”da ilk mövsümdə 24 qol vurdum, ikincidə isə 23. Dedilər ki, niyə bu il az fərqlənmisən? Halbuki indi baxıram 15-16 qol vururlar cəmi. İndi futbol bir qədər fərqlidir, daha çox biznesə bağlıdır hər şey. Nə etmək olar? İndi belədir. Çempionlar Liqasında final oynamaq istəyirsənsə, çox böyük pullar xərcləməlisən. Müasir futbolda pul çox əhəmiyyətlidir. Məncə, qiymətlər bir qədər şişirdilib.

­- Azərbaycan futbolunda tanıdığınız kimsə var?

- Konkret kimisə tanımıram. Yalandan nə deyim. Amma ümumi məlumatım var. Elə Bakıya gəlməkdə bir məqsədim də Azərbaycan futbolunu daha yaxından tanımaqdır. Bilirəm ki, ölkə futbolunun inkişafı üçün çalışılır. Şəhəri gördüm, çox bəyəndim. Azərbaycan, Bakı haqda hamı müsbət danışır.

İbrahim Cəfərov