Millimizin baş məşqçisi: “Qələbələrin ardı gələcək”

“Hər kəsi qələbə münasibəti ilə təbrik edirəm. Düşünürəm ki, azarkeşlərə xoş gün bəxş edə bildik. İnşallah, ardı gəlsin”.

Futbolxeber.az saytının məlumatına görə, bu sözləri minifutbol üzrə milli komandamızın baş məşqçisi Elşad Quliyev dünya çempionatında Sloveniyaya 4:0 hesabı ilə qalib gəldikləri oyundan sonra deyib.

Jurnalistlərin suallarını cavablandıran mütəxəssis Azərbaycan yığmasının Bakıda keçirilən dünya çempionatının favoritlərindən biri olduğunu söyləyib: “Turnirə çox ciddi hazırlaşmışıq. İlk oyunda bir qədər meydança amilinin təsiri oldu. Üstəlik, tribunalar dolu idi. Uşaqlar bir qədər problem yaşadılar. Bundan sonra bütün matçlarda belə oynayacağıq. Favorit komandalardan biriyik”.

O, yığmaya dəstək olan azarkeşlərə təşəkkür edib: “Hər kəsə çox sağ ol deyirəm. Fanatlar möhtəşəm idilər”.

E.Quliyev “Sloveniya üzərində qələbə ilk turda Bəhreynlə görüşdəki heç-heçənin təsadüfi olduğunu göstərir?” sualını belə cavablandırıb: “Bizim komandanın gücü bu da deyil, daha yuxarıdır. Uşaqların səviyyəsi yüksəkdir. İnanıram ki, bizi qarşıda daha yaxşı oyunlar gözləyir. Hər oyuna belə hazırlaşsaq, qələbələrin ardı gələcək”.

Millimizin baş məşqçisi Sloveniya ilə görüşdə qollarından birinin müəllifi olan, böyük futbolu minifutbola dəyişən “Xəzər Lənkəran”ın yetirməsi Kamran Abdullazadə barədə də fikirlərini bölüşüb: “Kamran yaxşı futbolçudur. Bir ildən artıqdır minifutbolda, “Zirə”də oynayır, həm də milliyə dəvət alır. Potensialı yüksəkdir. İstəməzdik ki, futbolu tez atsın. Xoşdur ki, “Xəzər Lənkəran”ın yetirməsinin bizə köməyi var. Amma Abdullazadə daha yaxşısını edə bilər”,

Quliyev dünya çempionatındakı rəqiblərin güclü olduğunu vurğulayıb: “Çətin rəqiblər hələ qarşıdadır. İstəyirsən dünya, yaxud Avropa çempionu ol, meydana boş çıxsan, rəqiblər xal almağa qadirdir. Bu gün son dünya çempionu Rumıniya Çad millisinə uduzdu. Bəli, bu, təsadüf idi. Lakin qələbə qazanmaq üçün meydanda can qoymalısan”.

Fərəc Aslanov