Bir alqış da PFL-ə

Hər bir tədbirin, yarışın, mərasimin gözəgörünməz qəhrəmanları olur. Hansı ki, təşkilatçılıqda üzərinə pay düşür, əziyyəti çox olsa da, çox adam bunu görmür, xəbər tutmur, hiss etmir. Dünən “ASK Arena”nı (köhnə adı ilə “Şəfa” stadionu - İ.) “Şahdağ-Qusar” şüarları bürüyəndə bir anlıq düşündüm ki, bu izdihamın yaşanmasında Peşəkar Futbol Liqasının böyük rolu var...

Sosial şəbəkələrdən, saytlardan əksəriyyətin xəbər tutduğu kimi, dünən “ASK Arena”da əsl futbol bayramı yaşandı. II Liqada böyük ölçüdə çempionunun adını müəyyənləşdirəcək “Şəfa” - “Şahdağ Qusar” oyununda 5 minə yaxın azarkeş var idi. Düzdür, nominal meydan sahiblərinin tərəfdarları daha çox tamaşaçı təsiri bağışlayırdılar. Qusarlı azarkeşlər isə sadəcə möhtəşəm idilər. Heç ölkə çempionu “Qarabağ” belə o cür dəstək görmür. 90 dəqiqə boyunca “Şahdağ Qusar” fanatları bir an da olsun susmadılar. Həm sevimli komandalarına möhtəşəm dəstək verdilər, həm də rəqibə öz meydanında cəhənnəm yaşatdılar. Azərbaycan futbolunun inkişafını ürəkdən istəyən hər bir kəsin görmək istədiyi mənzərə idi bu. Kaş ki, Premyer Liqadakı, I Liqadakı əksər matçlar bu cür atmosferdə keçə.

Təbii ki, dünən yaşanan izdihamda matçın önəmi, qusarlı fanatların futbol sevgisi, “Şəfa”nın öz ziyanın işləyən “10 manatlıq bilet” mövzusunun da rolu var. Lakin əminliklə deyə bilərik ki, Peşəkar Futbol Liqasının (PFL) həmişəki yüksək təşkilatçılığı olmasaydı, hər şey bu cür yüksək səviyyədə baş tutmazdı. Necə deyərlər, hər şey ən xırdalığına qədər hesablanmışdı. Buna görə də PFL-in yorulmaz komandasına alqış düşür.

Daha əvvəl də qeyd etmişik, eyni zamanda 5 müxtəlif turnir keçirmək heç kimə asan gəlməsin. İstədiyin qədər əməkdaşın və maliyyən olsa, problem olmaz. Lakin bilirik ki, PFL-in istər kollektivi, istərsə də maliyyə durumu geniş deyil. Buna baxmayaraq, insan işinə sevgi və məsuliyyətlə yanaşanda bir çox çətinliklərin öhdəsindən gəlir. Necə ki, artıq iki ildir Peşəkar Futbol Liqası bunu bacarır. Yorulmayasınız. Ki, biz də bu cür möhtəşəm matçlara, futbol şoularına tez-tez tamaşa edək.

İBRAHİM