Udanda danışmağa nə var ki...

Tarix həqiqətən də təkrarlanır. Elə atalar “söz vaxtına çəkər” misalını da əbəs yerə deməyiblər. Feysbuk sağ olsun, hər gün bizə həmin tarixdə əvvəlki illərdəki paylaşımlarımızı xatırladır. 5 may 2024-cü il tarixdə belə bir paylaşım etmişəm: “Son vaxtlar bəzi klublar, bəzi futbolçular mətbuatı konkret "yola verirlər". Jurnalist oyuna nə üçün gedir? Təbii ki, işləmək üçün. Məsələ oyuna baxmaqdısa, onu evdə, yolpulu vermədən, artıq vaxt itirmədən televizor vasitəsi ilə izləmək olar. Əgər oyundan sonra 20-30 futbolçudan heç biri danışmayacaqsa, mən nə üçün stadiona getməliyəm? Dünən "Qarabağ" - "Neftçi" oyunundan sonra bildiyim qədər bircə Rza Cəfərov mətbuata danışıb. Udan da danışmır, uduzan da. Belə hörmətsizlik olar? Biri qarajdan gedir (məsələn), bir dal qapıdan çıxır, o birsi pəncərədən uçur və s. Futbolçuları tanıdan, məşhurlaşdıran mətbuatdı. Mətbuat olmasa, kimdi onları tanıyan?”...

Yuxarıda tarix təkrarlanmasını əbəs yerə xatırlatmadım. Dünən də eyni hadisələr yaşandı. “Neftçi” - “Kəpəz” oyunundan sonra miks zonada təxminən yarım saat dayanan bu cızma-qaranın müəllifi flaqmanın bir futbolçusundan belə 2 cümlə qoparda bilmədi. Emin Mahmudov əksər hallardakı kimi danışmaq istəmədi, Şeydayev və Ozobiç mətbuatdan yayınmaq üçün miks zonadan heç keçmədilər, Sambu “no spik”lə kifayətləndi. Ağadadaş Salyanski qol epizodlarında olduğu kimi, miks zonada da susdu, Elvin Camalov isə avtobusda hamının onu gözlədiyini bəhanə gətirdi. Halbuki mən miks zonadan stadionun həyətinə çıxıb, qısa fasilə ilə 2 siqaret çəksəm də, “Neftçi”nin avtobusu yerindən tərpənməmişdi. O ki qaldı Rza Cəfərova, qolkiper ötən ildən fərqli olaraq daha danışmır. Artıq aylardır...

Başa düşürəm, komanda öz meydanında xal itirirsə, futbolçular məyusdur. Amma məyus olmaq mətbuatdan yan gəzməyə əsas vermir. O məntiqlə Samir Abasov mətbuat konfrasına qatılmasın, rəhbərlik sizin maaşını verməsin də. Razılaşarsınız? Təbii ki, yox. Rza Cəfərov hələ çəkinmədən həmkarlarımıza deyib ki, “udanda danışaram”. Udanda danışmağa nə var ki... Uduzanda çıxıb danışmaq lazımdır. Xüsusən də sən “Neftçi” kimi komandanın kapitanısansa... Hörmətli Rza Cəfərov, kapitanlıq təkcə qoluna sarğı taxmaqla olmur! 

Dünən “Qarabağ”ın yerli futbolçuları da miks zonada görünməyiblər. 4-5 legioner gözə dəyib, vəssəlam. Əbəs yerə deməyiblər ki, söz vaxtına çəkər…

İbrahim Cəfərov