Aleks Fernandes: “Zirə” ilə oyunda hədəf yalnız 3 xaldır”

“Neftçi”nin yarımmüdafiəçisi Aleks Fernandesin Futbolxeber.az saytına müsahibəsi

- Azərbaycan Premyer Liqasının ötən turunda səfərdə “Şamaxı”nı məğlub etdiniz. 2:0 hesablı qələbəni necə şərh edərdiniz?

- Ağır səfər oyun idi. Heyətimizdə itkilər vardı. Buna rəğmən, komandamız xarakter göstərdi. Sübut etdik ki, kimin meydana çıxması fərq etmir. Kim oynayır-oynasın, hədəfimiz dəyişmir. Vacib qələbə qazandıq.

- “Şamaxı”nın stadionu da daxil olmaqla, Premyer Liqanın bir neçə klubu süni meydanda oynayır. Bu, çıxışınıza nə dərəcədə təsir edir?

- Şamaxıdakı süni meydan keyfiyyətli deyil. Texnikalı futbolçular üçün bu, çətinlik yaradır. Amma başqa variant yoxdur, oynamalıyıq. Ona görə də qısa müddət ərzində şəraitə adaptasiya olduq.

- Növbəti rəqib “Zirə”dir. Bugünkü matçdan gözləntiləriniz nədir?

- Çətin matç olacaq. Ümumiyyətlə, Azərbaycan Premyer Liqasında asan oyun yoxdur. Buna baxmayaraq, biz “Neftçi”yik. “Zirə” ilə oyuna qələbə üçün çıxacağıq. Hədəf yalnız 3 xaldır.

- Bu gün qələbə qazanacağı halda, “Neftçi” turnir cədvəlində “Sabah”ı geridə qoyacaq və 4-cü pillədəki “Turan Tovuz”la xal fərqi 9-a enəcək. Demək olar ki, “Neftçi” üçün avrokuboklara çempionatdan da yollanmaq ümidi yaranıb?

- Bizim üçün həm çempionat, həm də kubok vacibdir. Hər iki yarışda sona qədər mübarizə aparacağıq. Gələcək oyunlar barədə çox danışmaq istəməzdim. İndi sadəcə “Zirə” ilə oyuna köklənmişik. Hər matça qələbə qazanmaq istəyirik.

- Kubokda finala adlamaq şansını necə dəyərləndirirsiniz?

- Düşünürəm ki, final şansımız heç də az deyil. Bəli, ilk oyunda öz meydanımızda uduzduq. Lakin hələ heç nə bitməyib. Biz niyə onları səfərdə məğlub etməyək? Səfərdə qalib gəlib finala çıxacağımıza inanıram. Həlledici matça yüksəlmək üçün sona kimi mübarizə aparacağıq.

- Mövsümün sonunda “Neftçi”dəki icarə müddətiniz bitir. Lakin razılaşmaya əsasən, sözləşməni artırmaq mümkündür. “Neftçi”də qalacaqsınız?

- Gəlin tələsməyək. Öncə mövsümün sonunu gözləməliyik.  Sonra bu haqda danışa bilərik.

Fərəc Aslanov