Sərxan Hacıyev ofsaydda

Dünən Tovuz şəhər stadionunda yenə izdiham idi. Hələ “Qarabağ”la oyuna saatlar qalmış yeni inşa olunmuş əsas korpus binasının açılışı mərasimi keçirildi. Təxminən  2 il əvvəl “Turan Tovuz”un baş sponsoru “Huner Group”un maliyyə vəsaiti hesabına tikilən binanın təməli qoyulmuşdu. Qısa müddət ərzində 4 mərtəbədən ibarət bina hazır vəziyyətə gətirilib. Regionda bu cür infrastrukturun yaradılması çox xoşdur. “Huner Group” həqiqətən də bölgədə futbolun inkişafı üçün əlindən gələni edir.

Dünən açılış mərasiminə qatılanlar arasında AFFA-nın baş katibi Cahangir Fərəcullayev də var idi. Fərəcullayevin Tovuzdakı açılışa qatılması iki məqamla xüsusi diqqət çəkdi.

Birincisi, baş katib bu dəfə tək idi, digər tədbirlərdə olduğu kimi, sələfi Sərxan Hacıyev onu müşayiət etmirdi. Bu, gözlənilən idi. Daha əvvəl baş katib postu ilə vidalaşan S.Hacıyev yaxın gələcəkdə hazırkı vəzifəsini də itirəcək. Necə deyərlər, o, yavaş-yavaş ofsayda salınır. Maksimum növbəti seçkidə icraçı vitse-prezident AFFA-dan gedəcək.

Qeyd etdiyimiz kimi, bu, heç də gözlənilməz deyil. AFFA-da qalmaq üçün əvvəlki rəhbərliyi yarıyolda qoyub, yeni komandaya “transfer olunarkən” Sərxan bəy bütün bunları düşünməli idi. Halbuki belə etməsəydi, bəlkə də gələcəkdə İdman Nazirliyində hansısa vəzifə tutardı...

Dünənki tədbirdə idman mediası nəhayət ki, yeni baş katibin çıxışını dinlədi. Buna qədər yalnız veteranların ad günündə forma ilə fotosu yayılan Cahangir Fərəcullayev heç də kiçik fiqur deyil. Qısa zamanda AFFA-nın fəaliyyətini öz əlində cəmləyəcək. Maksimum ilin sonunda assosiasiyada yeni dəyişikliklərə şahidlik edəcəyik. Yeni baş katib işi kənara qoyub, başları şəxsi maraqları naminə intriqalar aparmağa qarışanları bir-bir AFFA-dan uzaqlaşdıracaq... Gözləyək...

TAĞI