Ayxan Abbasov: “Qələbəni haqq edirdik”

“Komandamı və azarkeşlərimizi təbrik edirəm. Səfərdə bizi tək qoymadılar, yaxşı dəstək oldular. Çoxdandır ki, bu xalı, qələbəni haqq edirdik”.

Futbolxeber.az saytının məlumatına görə, bu sözləri “Şamaxı”nın baş məşqçisi Ayxan Abbasov Azərbaycan Premyer Liqasının 25-ci turunda “Səbail”ə 2:0 hesabı ilə qalib gəldikləri oyundan sonra deyib.

O, Premyer Liqada qalmaq üçün sona qədər biz də mübarizə aparacaqlarını bildirib: “Önəmli oyun idi. Qışdan sonra "Səbail" bircə "Qarabağ"a uduzmuşdu. Mövsümün ikinci yarısına çox yaxşı başlamışdılar. İlk dəqiqələrdə oyunumuz istədiyimiz kimi alınmadı. Ondan sonra futbolçularım toparlandı, tapşırıqları yerinə yetirməyə çalışdılar. İkinci hissə tam üstünlüyümüz şəraitində keçdi. Böyükhesablı qələbə ola bilərdi. Premyer Liqada qalmaq üçün sona qədər biz də mübarizə aparacağıq”.

Abbasov bu qələbənin gələcək oyunlara komandanı kökləməyə müsbət təsir edəcəyini vurğulayıb: “Rəqibimizdən 6 xal irəlidəyik. Qışdan sonra pis oyunumuz olmamışdı. Təəssüf ki, uduzurduq. Sadə səhvlər edirdik. Futbolçularda konsentrasiya yaxşı idi. Müdafiədə yaxşı oynadıq. Qələbə gələcək üçün motivasiyadır”.

Mütəxəssis ilk hissədə oyunlarının alınmamasının səbəbini belə izah edib: “Səbail” matça yaxşı başlamışdı. Onlar evdə çox yaxşı oynayırlar. Cavid Hüseynov gələndən komanda fərqlənir. Amma qapımız qarşısında təhlükə yox idi”.

“Şamaxı”nın baş məşqçisi bildirib ki, hər an sonuncu pilləyə düşə biləcəklərini ehtimalını nəzərə alırlar: “Məşqçilik stresli işdir. Bunu fikirləşsək də, komandaya biruzə verməməliyik. Sonuncu pilləyə düşə bilərdik. Bu gün sonuncu yerdəki komanda da dəyişə bilər. Fərq 4-6 xaldır. Bunu fikirləşib, tam da özümüzü stressə salmırıq. Amma onu da düşünürük ki, hər an sonuncu pilləyə düşə bilərik. Bu qələbə bizi daha da irəli apardı”.

O, meydana yeni kapitanla çıxmaqlarına da aydınlıq gətirib: “Yeni kapitan lazım idi meydançada. Səbayıl Bağırov, Arsen Ağcabəyova güvənmişik. Onlar olmayanda, kapitanlığı Leroy Mikelsə vermişdik. O da olmayanda, sarğını Rafael Məhərrəmliyə veririk”.

Mütəxəssis Leroy Mikelsin zədəsinin ağır olduğunu söyləyib: “Sabah”la yoldaşlıq görüşündə ilk dəfə zədələnmişdi. "Zirə" və "Neftçi" ilə görüşlərdə ayağında sümük zədəsi yarandı. Müalicə olunur”.