Elmar Baxşıyevdən qələbə şərhi

"Bilirdik ki, ağır oyun olacaq. Hər iki komanda meydanda yaxşı mübarizə apardı. Futbolçularım bu gün yaxşı iş gördülər. Düşünürəm ki, layiqli qələbə qazandıq. Bu matçı unudub çempionat oyununa hazırlaşmağımız vacibdir. Heyətdə zədəli oyunçuların çox olmasına baxmayaraq, yolumuza davam edirik”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Elmar Baxşıyev Azərbaycan Kubokunun 1/4 final mərhələsinin cavab oyununda “Zirə”ni 2:0 hesabı ilə məğlub etdikləri matçdan sonra deyib.

Mütəxəssis zədəli futbolçuların durumundan da söz açıb: “Bəzilərində mikrozədədir, bəziləri komanda ilə məşqlərə başlayıb. Getdikcə optimal heyətə yaxın olacağıq”.

“Araz-Naxçıvan”ın baş məşqçisi cütün taleyini 3 penaltinin həll etməsi barədə sualı belə cavablandırıb: “Düşünürəm ki, təsadüfdür. Bu gün "Zirə"nin də yaxşı epizodları oldu. Qapıçımız inamlı oynadı. Penalti də oyunun bir hissəsidir. Biz də bundan istifadə etdik”.

Xatırladaq ki, 2 oyunun nəticəsinə görə “Zirə”ni 3:0 hesabı ilə məğlub edən “Araz-Naxçıvan” ölkə kubokunda yarımfinala adlayıb.