Kurban Berdiyev: “Artıq yoruldum deməkdən ki...”

"İkinci hissənin ilk 15 dəqiqəsinə toparlanmış vəziyyətdə çıxa bilmədik. Bu da iki qol buraxmağımızla nəticələndi. Sonradan isə nəyisə düzəltmək artıq çətin oldu".

Futbolxeber.az saytının məlumatına görə, bu sözləri "Turan Tovuz"un baş məşqçisi Kurban Berdiyev Azərbaycan Premyer Liqasının 22-ci turunda "Sabah"a 1:2 hesabı ilə uduzduqları görüşdən sonra keçirilmiş mətbuat konfransında deyib.

Daha sonra o, jurnalistlərin suallarını cavablandırıb.

- Ayxan Quseynov və Xəyal Nəcəfovu matçın 85-ci dəqiqəsində meydana buraxdınız. Onlara daha tez şans vermək olmazdı?

- Tez də buraxa bilərdik. Amma başqa şeylər də düşünürdük. Belə alındı.

- "Sabah" sizin üçün nədə sürpriz etdi?

- İlk olaraq biz rəqibə ikinci toplarda uduzduq. İkinci qolu buraxdığımız ana gəldikdə, Rəhim Sadıxovun butsısı çıxmışdı, hakimlə uzun mübahisə oldu. Ona fit vermədilər. Uzun mübahisə oldu, rəqib isə dərhal oynadılar və qollarını vurdular.

- Hakim idarəçiliyindən razı qaldınız?

- Nəsə deməyimlə nəsə dəyişəcəksə, başqa məsələ. Mənim dediklərimlə heç nə dəyişməyəcəksə, danışmağın mənası da yoxdur. Artıq yoruldum deməkdən ki, Jo Batiştanı əlləri ilə tuturlar, imkan vermirlər oynamağa. Lakin hakim fitini səsləndirmir.