Azərbaycan Kubokunda son 20 mövsümün antirekordu

Azərbaycan Kubokunda son 20 mövsümün antirekordu qeydə alınıb.

Futbolxeber.az-ın Peşəkar Futbol Liqasının saytına istinadən verdiyi məlumata görə, bu, 1/4 final mərhələsinin ilk oyunlarında dörd qolun vurulması ilə mümkün olub.

“Kəpəz” - “Neftçi” (0:2) görüşündə iki, “Araz-Naxçıvan” - “Zirə” (1:0) və “Səbail” - “Qarabağ” (0:1) qarşılaşmalarında bir qol qeydə alınıb. “Sabah” - “Sumqayıt” (0:0) matçında isə hesab açılmayıb.

2004/2005 mövsümündə də 1/4 finalın ilk oyunlarında eyni sayda qol vurulub.

“Neftçi” - “İnter” və “Gənclərbirliyi” - “MKT-Araz” qarşılaşmaları qolsuz yekunlaşıb. MOİK “Xəzər Lənkəran”a 0:1, “Karat” “Bakı”ya 1:2 hesabı ilə məğlub olub. Bu nəticə 20 ildən sonra təkrarlanıb.

2004/2005 və 2024/2025 mövsümlərindəki göstərici 1/4 finalın bütün görüşləri baş tutan ilk matçlar üçün antirekord sayılır. Çünki daha az - 2 qolun vurulduğu 1997/98 mövsümünün 1/4 finalının ilk oyunlarından 3-ü keçirilib

Hər iki top da OİK - “Neftçi” matçında vurulub - 1:1. “Kəpəz” - “Bakılı”, “Dinamo” - “Qarabağ” görüşləri qolsuz yekunlaşıb. Bərdə “Pambıqçı”sı fəaliyyətini dayandırdığı üçün “Kür-Nur”la qarşılaşması texniki nəticəyə səbəb olub.