Yuri Matias: “Neftçi” hər il avrokuboklarda oynamalıdır”

“Neftçi”nin müdafiəçisi Yuri Matiasın Futbolxeber.az saytına müsahibəsi

- “Şamaxı” üzərində 1:0 hesablı qələbə qazandınız. Görüşü necə şərh edərdiniz?

- Bilirdik ki, bizi çətin oyun gözləyir. Rəqib mübariz komandadır. Bizim də məqsədimiz 3 xal qazanmaq idi. Kollektiv şəkildə istəyimizə çatdıq və qalib gəldik.

- Demək olar ki, indiki məqamda “Neftçi” üçün gözəl oyundan daha çox nəticə vacibdir? Çünki ikinci hissədə hiss olunurdu ki, daha çox qol buraxmamağa çalışırdınız...

- Ümumi götürəndə dediklərinizin bir hissəsi ilə razıyam, bir hissəsi ilə yox. İndiki məqamda bizə ardıcıl qələbələr lazımdır. Özümüzə inamı geri qaytarmalıyıq. Lakin ikinci hissədə hesabı qorumaq fikri ilə razı deyiləm. Çünki istər ilk, istərsə də ikinci 45 dəqiqə yalnız qələbə üçün oynayırdıq. Qol epizodlarımız da var idi. Təəssüf ki, onları dəyərləndirə bilmədik. Rəqibin isə əksinə, ikinci hissədə demək olar ki, real qol şansı olmadı.

- Yuxarı pillələrlə xal fərqi çox olduğundan “Neftçi”nin avrokuboklara yollanmaq üçün əsas ümidini kubokla bağladığını söyləyə bilərik?

- Hazırkı durumda realist olmalıyıq. Bəli, daha çox kuboka köklənəcəyik. Heç kim istəməzdi ki, belə vəziyyətlə üzləşək. Oyunçular olaraq biz indiki məqama görə daha çox üzülürük. İnanıram ki, yekunda azarkeşlərimizi sevindirə biləcəyik. “Neftçi”də oynamaq hər matça qələbə üçün çıxmaq deməkdir. Kubokla Avropaya getmək üçün yol daha qısadır. “Neftçi” hər il avrokuboklarda oynamalıdır.

- Razılaşırsınız ki, cari mövsümün yeganə xilas yolu “Neftçi”nin kuboku qazanmasıdır?

- “Neftçi”də hər oyun qələbə tələb olunur. Kuboku qazanmaq üçün əlimizdən gələni edəcəyik. Lakin bu o demək deyil ki, çempionata ikinci dərəcəli gözü ilə baxırıq. Qətiyyən. Bilmək olmaz, bəlkə elə mövsümün sonunda daha yuxarı pillədə qərarlaşdıq və avrokuboka elə Premyer Liqadan vəsiqə qazandıq. Yəni tələsmək olmaz. Amma dediyim kimi, hazırkı məqamda kubokda daha çox şansımız var. Bu turnirdə qalib olmağımız bizə bir qədər sakitçilik, rahatçılıq verər.

- Baş məşqçi dəyişikliyindən sonra “Neftçi”nin fiziki durumu artıq qaydasına düşüb...

- Düşünürəm ki, baş məşqçi dəyişikliyi də, Samir Abasovun seçimi də düzgün qərar idi. Çünki o, “Neftçi”ni yaxşı tanıyır, buradakı tələbləri gözəl bilir. Məşqçi dəyişikliyi həm də hər bir futbolçu üçün əlavə motivasiyadır. Bəli, Abasovun gəlişindən sonra irəliləyiş göz önündədir. İstər fiziki baxımdan, istərsə də oyun planında.

- Bir müddət əvvəl Braziliya mətbuatına müsahibənizdə “Neftçi”dən yeni müqavilə təklifi almadığınızı demişdiniz. Həmin açıqlama rəhbərlik tərəfindən narazılıqla qarşılanmadı?

- Həmin müsahibədə anlaşılmazlıq olmuşdu. Mən peşəkar futbolçuyam, klubla mövsümün sonuna kimi müqaviləm var. “Neftçi”nin də zamanı var ki, vəziyyəti analiz etsin, lazımi addımları atsın. İstər mən, istərsə də digər futbolçularla bağlı. Mən müqaviləmin sonuna kimi “Neftçi” üçün hər şeyimi verməyə hazıram. Son matça kimi də bu formanın haqqını verəcəm.

- Konkretləşdirsək, “Neftçi”də qalmaq istəyirsiniz, yoxsa siz də vəziyyəti mövsümün sonunda dəyərləndirəcəksiniz?

- “Neftçi”yə gəldiyim ilk gündən, istər azarkeşlər, istər klub rəhbərliyi, istər sıravi azərbaycanlılar tərəfindən çox yaxşı qarşılanmışam. Hər bir futbolçu üçün bu cür sevgi görmək çox xoşdur. Diqqət, qayğı, sevgi hiss edirsənsə, kim istəməz ki, bu cür yerdə qalsın?

İbrahim Cəfərov