Ehtiram Quliyev: “Hakimlər komitəsindəki dəyişiklik çempionatımıza müsbət təsir edib”

“Turan Tovuz”un İdarə Heyətinin sədri Ehtiram Quliyev “Qarabağ”a 2:1 hesabı ilə qalib gəldikləri oyundan sonra jurnalistlər üçün brifinq keçirib. Futbolxeber.az saytının əməkdaşının da iştirak etdiyi müsahibəni təqdim edirik:

- Dramatik sonluqla bitən matçda “Qarabağ” üzərində 2:1 hesablı qələbə qazandınız. Təəssüratlarınız necədir?

- Ən vacibi, bizi sevindirən odur ki, gözəl oyun oldu. Qələbəyə hər zaman sevinirik. “Qarabağ” kimi komandadan alınan hər bir xal bizi xoşbəxt eləməyə bilməz. Azarkeşlərimizə təşəkkür edirik. Onlar göstərdilər ki, “Turan Tovuz”un təkcə yaxşı deyil, həm də pis gününün dostudurlar.

- Bu mövsüm 3 oyunda “Qarabağ”dan 7 xal almısınız. “Turan Tovuz” Ağdam klubu ilə matçlara xüsusi hazırlaşır?

- “Qarabağ” böyük komandadır. Çempionatımızdakı hər bir komanda “Qarabağ”a qarşı xüsusi motivasiya ilə oynayır. O cümlədən də biz. Xüsusi bir hazırlığımız yoxdur. Belə nəsib olur.

- “Qarabağ” üzərində qələbələr klub rəhbəri kimi sizin özünüzün gələcəklə bağlı motivasiyanıza necə təsir edir?

- Hər qələbədə olduğu kimi. Azərbaycan futbolunda “Qarabağ”ın rolu əvəzsizdir. Bu qələbələrimiz çempionatın maraqlı olmasına gətirib çıxarır, rəqabəti artırır. Bu məğlubiyyətlər “Qarabağ”ın özünə də faydalıdır. Rəqabət artdıqca keyfiyyət də artır.

- “Turan Tovuz” “Kəpəz”ə uduzur, sonra “Qarabağ”a qalib gəlir. Çempionatın səviyyəsini necə dəyərləndirirsiniz?

- Çempionatda autsayder yoxdur. Hər komanda ciddi rəqibdir. Bunu görürük. İldən ilə çempionatımızda baxımlılıq artır. Bunun üçün təşkilatçılara, PFL-ə təşəkkür edirəm. Xüsusən də qeyd etməliyəm ki, hakimlər komitəsindəki dəyişiklik çempionatımıza müsbət təsir edib. Bizi gözəl günlər gözləyir.

- Legioner limitinin ləğvi ilə bağlı fikirləriniz necədir? “Turan Tovuz” bu qərarın lehinədir, ya əleyhinə?

- Konkret fikir bildirmək olmur. Çünki mən limitin ləğvini elə əsaslandıraram ki, hamı bunu dəstəkləyər. Yaxud da əksinə. Ləğv olunmamasını də eyni cür əsaslandıra bilərəm. Biz sadəcə müddətə etiraz edirik. Çünki uzunmüddətli konktraktlarımız var. Lakin qərar qəbul olunsa, ayaq uyduracağıq.

- İlyarımdır AFFA “Turan Tovuz”un stadionunun ot örtüyünün dəyişdirilməsi üçün maliyyə vəsaiti ayırmır...

- Bizim onların səmimiyyətlərinə qətiyyən şübhəmiz yoxdur. Həqiqətən də büdcədə bunun üçün vəsait yoxdur. Lakin müzakirə gedir. Biz bu məsələni ona görə gündəmdə saxlayırıq ki, sabah maliyyə olarsa, ilk bu məsələ həll olunsun. Çünki biz bu işə öz nöqteyi-nəzərimizdən deyil, futbolumuzun inkişafı baxımından baxırıq.  

- Növbəti mövsüm üçün ot örtüyünün dəyişdiriləcəyini dəqiqliklə söyləmək mümkündür?

- Martdan tez düşünə bilmərik. Həmin vaxt klubun İdarə Heyətinin iclasının toplantısı olacaq və orada qərar qəbul olunacaq ki, qazonu nə vaxt dəyişdiririk.

Fərəc Aslanov