Elmar Baxşıyevdan qələbə şərhi

“Oyunun ağır və dramatik keçəcəyini təxmin edirdik. Qış fasiləsindən sonra "Neftçi"nin göstərdiyi oyun bizə müəyyən siqnallar verirdi ki, ağır oyun olacaq. Ümumi götürəndə, komandamın çıxışından razı qaldım. Yaxşı, əzmkar, istədiyim futbolu mənə qaytarmağı çalışırdılar. Qələbə qazandıq. Komandamı təbrik edirəm, qarşıdakı oyunlara hazırlaşacağıq”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Elmar Baxşıyev Azərbaycan Premyer Liqasının XX turunda “Neftçi”yə 2:1 hesabı ilə qalib gəldikləri oyundan sonra deyib.

“Birinci hissədə nə etdiz ki, rəqib 4 əvəzetmə birdən etdi?” sualını o, belə cavablandırıb: “Daha çox özümüzə köklənirik. Rəqibin məşqçisi nə edəcəksə, bizə də sirr qalır. Bizi daha çox düşündürən öz oyunumuz, oyun-dəst xəttimizdir. Hesabda öndə olanda rəqib üstünə gəlir. Bu da normaldır”.

E.Baxşıyev son 3 turda məğlubiyyətin komandaya psixoloji təzyiq göstərmədiyini bildirib: “İdman mediası bizi "qara zolağ"a salmağa çalışırdı. Bu zolaq yoxdur. Nə mən, nə də komanda təzyiq altındadır. Futbolda udmaq necə əhəmiyyətlidirsə, məğlubiyyəti də gözləməlisən. Komanda olaraq uğurlu nəticəyə köklənirdik”.