Marko Yankoviç: “Növbəti oyunumuz daha çətin olacaq. Başqa səviyyə, başqa sürət...”

“Qarabağ”ın yarımmüdafiəçisi Marko Yankoviç Azərbaycan Premyer Liqasının XIX turunda “Şamaxı” üzərində qazandıqları 3:2 hesablı qələbəni şərh edib.

Futbolxeber.az saytına açıqlamasında monteneqrolu yarımmüdafiəçi qalib gəlmələrinə baxmayaraq, hazırda ideal formada olmadıqlarını bildirib:

“Qış fasiləsindən sonra yeni ildə ilk oyunumuz idi. Hələ ki ideal formada deyilik. Bunun üçün bir neçə matça ehtiyac var. Bəzi səhvlərimiz oldu. Texniki, yaxud mövqe seçimi baxımından. Lakin istənilən halda 3 xal götürdük. Bundan sonra daha yaxşı çalışmalıyıq ki, növbəti oyunlarda da istədiyimiz nəticələri əldə edək”.

O, gələn həftə UEFA Avropa Liqasında Rumıniyanın FSCB klubuna qarşı keçirəcəkləri matçdan da söz açıb:

“Daha çətin olacaq. Başqa səviyyə, başqa sürət... Hazırda daha bir neçə gün məşq etmək üçün vaxtımız var. Öz meydanımızda oynayacağıq. 3 xal qazanmaq üçün əlimizdən gələni edəcəyik”.