II Liqada ayın qolunun müəllifi: “Əsas komandamın uğurudur”

“Çətin oyun oldu. Rəqib yaxşı komandadır. Çox çalışırdılar, bizdə isə sona yaxın bir qədər yorğunluq oldu. Mən özüm komandaya tam kömək edə bilməsəm də, uşaqlar çox gözəl mübarizə apardılar. Yekunda qələbə qazandıq”.

Futbolxeber.az saytına müsahibəsində bu sözləri II Liqada mübarizə aparan “Dinamo”nun hücumçusu Valeh Seyidov VII turda “Saatlı-Araz” üzərində qazandıqları 1:0 hesablı qələbəni şərh edərkən deyib.

Valeh Seyidov matçdan öncə II Liqada “Ayın qolu” layihəsinin ilk qalibi kimi mükafatlandırılmasına belə münasibət bildirib: “Sevindirici haldır. İlk dəfə mənim qalib olmağım çox xoş oldu. Təbii ki, əsas komandamın uğurudur. Lakin vurduğum qolun, adımın belə gözəl hadisədə hallanması çox xoşdur”.

Təcrübəli forvard qeyd edib ki, bu cür layihələrin təşkil olunması II Liqada mübarizə aparan kollektivlər, futbolçular üçün əlavə motivasiyadır: “II Liqada klubların maddi vəziyyəti heç də ürəkaçan deyil. Bu kimi motivasiyaedici lahiyələr klublara kömək olur. Odur ki, belə layihələrin olması çox gözəldir. İstərdik ki, gələcəkdə daha çox yeni layihələr olsun”.

Fərəc Aslanov