AFFA-nın yeni rəhbərliyi qələbə üzünə həsrətdir

2 aprel 2024-cü ildə Rövşən Nəcəf AFFA-nın yeni prezidenti seçildi. Həmin gün həm də AFFA İcraiyyə Komitəsinin yeni tərkibi formalaşdı. Bəziləri AFFA prezidenti postunda, eləcə də İcraiyyə Komitəsinin heyətindəki dəyişikliklərdən sonra futbolumuzun ağ günə çıxacağını proqnozlaşdırırdı. Lakin geridə qalan 6 ay 10 gün bunun əksini göstərir. Belə ki, son yarım il ərzində istər əsas, istərsə də U-21 millimiz rəsmi oyunlarda nəinki qələbə, hətta xal üzünə belə həsrət qalıb.

Əsas millimiz böyük ümidlərlə baş məşqçi postuna gətirilən Fernandu Santuşun rəhbərliyi altında keçirdiyi 3 oyunun hamısında uduzub. Topların fərqi isə 2-nin 8-ədir. Özü də uduzduğumuz hər 3 rəqibi yaxın keçmişdə məğlub etmişdik. 2 gün əvvəl səfərdə biabırçı şəkildə uduzduğumuz Estoniyanı 2:0 hesabı ilə üstələmişdik. Bakıda 1:3 hesabı ilə məğlub olduğumuz İsveçi elə paytaxtımızda 3 cavabsız qolla darmadağın etmişdik. Eləcə də Santuşun səfərdə 0:2 hesabı ilə uduzduğumuz Slovakiyaya de Byazinin rəhbərliyi altında 2:1 hesabı ilə qalib gəlmişdik.

Əvvəlki Millətlər Liqasında milli komandamız qrupda ikinci olmuşdu. Lakin azarkeşlər bu nəticədən narazı qalmışdılar. Millidən qrup qalibi kimi B liqasına vəsiqə tələb olunurdu. İndi isə vəziyyət o həddə çatıb ki, milli komandamız əmin addımlarla San Marino, Andorra kimi qitənin ən zəiflərinin yer aldığı D liqasına doğru irəliləyir. Yaxın keçmişdə qrup ikinciliyə ağız büzdüyümüz halda bu gün qrupda üçüncü olmaq üçün az qalırıq ki, nəzir deyək.

Yeni AFFA rəhbərliyinin dövründə əsas milli kimi, U-21 də ancaq məğlubiyyətləri sıralayır. Gənclər yığmamız da son 6 ayda keçirdiyi 3 rəsmi görüşün 3-də də yenilgi acısı yaşayıb. Komandamız Lüksemburqa 1:2, Serbiyaya 0:2, Şimali İrlandiyaya isə 0:5 hesabı ilə uduzub.

Gördünüyü kimi, AFFA-dakı rəhbər dəyişikliyindən sonra milli komandalarımız 6 rəsmi matç keçiriblər və hamısında da uduzublar.

Hələ yaxşı ki, 19 və 17 yaşadək futbolçularımızdan ibarət millilərimiz seçmə mərhələdə mübarizəyə başlamayıblar. Çünki bu komandaların yoxlama oyunlarındakı nəticələri sözügedən yığmalar üçün seçmə mərhələdə yaxşı perspektiv vəd etmir...

Futbolxeber.az