Elvin Cəfərquliyev: “Onların sayəsində oyun maraqlı keçdi”

“Qarabağ”ın müdafiəçisi Elvin Cəfərquliyevin Futbolxeber.az saytına müsahibəsi

- Vurduğun qol sayəsində “Sumqayıt” üzərində 1:0 hesablı qələbə qazandınız. Qazanılan 3 xalı necə şərh edərdin?

- Çətin də olsa, vacib qələbə qazandıq. Sumqayıtlı azarkeşlərə təşəkkür etmək istərdim. Onların sayəsində oyun maraqlı keçdi. Stadionda möhtəşəm atmosfer var idi. Qolu mənim, yaxud bir başqasının vurması önəmli deyil. Əsas odur ki, qalib gəldik.

- “Qarabağ” qələbəni çətinliklə qazandı. Ola bilərmi ki, “Malmö”yə məğlubiyyətdən sonra komandada psixoloji gərginlik yaranıb?

- Heç bir psixoloji amil yox idi. Komandamızda yetərincə təcrübə var. Belə hallara əvvəllər də düşmüşük, vəziyyətdən çıxmışıq da. Üzərimizdə hər hansı basqı yoxdur.

- İlk dövrə geridə qaldı. Ötən mövsümlə müqayisədə “Qarabağ”ın çempionatda bu il işinin daha çətin olacağını deyə bilərik?

- Müqayisə edə bilmərəm. Amma çətin oyunlarımız oldu. İlk dövrənin asanlıqla keçdiyini söyləmək olmaz.

- Sıx qrafikdə oynadığınızı nəzərə alsaq, qarşıdakı fasilə “Qarabağ”ın xeyrinə ola bilər?

- Məncə, milliyə getməyən futbolçular üçün bu fasilə xeyirli olacaq. Amma biz millinin düşərgəsinə yollanırıq deyə istirahət edə bilməyəcəyik.

- Millidən söz düşmüşkən, qarşıdan Estoniya ilə oyun gəlir. Həmin matçdan gözləntilərin nədir?

- Çətin oyun olacaq. Səfərə çıxış edəcəyik. Bununla belə, əlimizdən gələni edəcəyik ki, qələbə qazanaq.

- Adətən millinin oyununa azarkeşlər maraq göstərmirlər. Necə düşünürsən, Estoniyada qazanılacaq qələbə Slovakiya ilə Bakıdakı oyunun azarkeş marağına təsir göstərə bilər?

- Azarkeşlərin marağı millinin performasından asılıdır. Qələbələr qazandıqca azarkeşlər də stadiona daha çox gələcəklər. Məncə də, Estoniya səfərində qələbə qazansaq, Slovakiya ilə matçda azarkeşlər gəlib bizə dəstək olarlar.

Fərəc Aslanov