Sergey Samok: “Debütumu uğurlu saymaq olmaz”

“Turan Tovuz”un qapıçısı Sergey Samokun Futbolxeber.az saytına müsahibəsi

- “Şamaxı” ilə oyunun sonu dramatik alındı. 2:2-lik bərabərliyi necə şərh edərdiniz?

- Oyuna yaxşı başladıq. Sonradan tempi aşağı saldıq və nəticədə rəqibin epizodları yaranmağa başladı. İkinci hissənin əvvəlini boşa verdik. Yaxşı ki, sonda bərabərlik qolunu vura bildik.

- İkinci hissəyə zəif başlamağınıza səbəb nə idi?

- Konkret nəsə deyə bilmərəm, izah etmək çətindir. Bu, ilk dəfə deyil. Əvvəlki matçlarda da hissənin əvvəlində qol buraxmışdıq.

- “Şamaxı” ilə matçda Azərbaycan Premyer Liqasında və “Turan Tovuz”da rəsmi debüt etdiniz. Debütunuzdan razı qaldınız?

- Debütumu uğurlu saymaq olmaz. Çünki qapımızda 2 qol gördük.

- Həyəcanlı deyildiniz?

- Oyunun əvvəlində bir qədər həyəcan var idi. Lakin sonradan hər şey qaydasına düşdü.

- Çempionatın səviyyəsi gözlədiyiniz kimidir, yoxsa daha yüksək və ya nisbətən aşağı?

- Bura gələnə qədər Azərbaycan çempionatı barədə geniş məlumata sahib deyildim. Amma görürəm ki, səviyyə yüksəldir. Rəqabət var. İstisna kimi “Qarabağ” digərlərindən seçilir. Ümumilikdə hər şey yaxşıdır. Komandalar mövsüm ərzində bir-birləri ilə 4 dəfə qarşılaşırlar. İlk dəfədir bu cür halla rastlaşıram.

- Bu, yorucu deyil? Çünki kuboku da nəzərə alsaq, bəzən elə olur ki, eyni komanda ilə mövsüm ərzində 6 dəfə qarşılaşmaları olursan...

- Xeyr, yorucu olduğunu düşünmürəm. Əksinə, maraqlıdır. Bu halda sən rəqibləri daha yaxşı tanıyırsan. Taktiki gedişlərinə bələd olursan, hansı oyuna üstünlük verdiklərini bilirsən.

- “Turan Tovuz”u mövsümün sonunda neçənci yerdə görürsünüz?

- Birinci yerdə.

- Bəs alınmasa?

- Məqsədimiz avrokuboklara vəsiqə qazanmaqdır. Bunun üçün ilk üçlüyə düşmək lazımdır. Eləcə də kuboku da unutmaq olmaz. Qarşıya qoyulan hədəfə çatacağımıza inanıram.

İbrahim Cəfərov