Berdıyev: “Xarakter göstərdik”

“Paltardəyişmə otağında uşaqlara dedim ki, hər iki hissənin ilk dəqiqələrini uduzduq. Amma ümumən xarakter göstərdik. Futbolçularımdan çox razı qaldım”.

Futbolxeber.az saytının məlumatına görə, bu sözləri “Turan Tovuz”un baş məşqçisi Kurbam Berdıyev Azərbaycan Premyer Liqanın 6-cı turunda “Sabah”la 2:2 yekunlaşan oyundan sonra deyib.

Təcrübəli mütəxəssis daha sonra mətbuat konfrasında jurnalistlərin suallarını cavablandırıb.

- Son dəqiqələrdə sayılmayan qolla bağlı fikirləriniz necədir?

- Yan xətt hakimi bildirdi ki, top göydə olanda meydanı tərk edib. Amma videoda görünmürdü. Bu, artıq onun qərarıdır.

- Şəhriyar Əliyevin yoxluğu necə təsir göstərdi?

- Bəli, onun yoxluğu hiss olunurdu. Amma ümumən uşaqlar öhdəsindən gəldilər.

- Bu gün komandanızın oyununa 5 ballıq şkala ilə neçə bal verərdiniz?

- Qiymətləndirə bilmərəm. Bəzi problemlər var idi. Yaxşı məqamlar da var, yaxşı olmayan məqamlar da.

- Komandanızdan nə dərəcədə razısınız?

- Tam razıyam desəm, düz olmaz. Amma futbolçular həm məşqdə, həm də oyunda əllərindən gələni edirlər. Bu, bizi qane edir.

- Qələbələr gəldikcə azarkeşlər artıq çempionluq haqda danışır. Bu, üzərinizdə təzyiq yaratmır?

- Bu, azarkeşlərin təbii istəyidir. Biz onlara təşəkkür edirik. Futbolçularım hər oyunda daha çox can qoymağa çalışırlar. Necə alınacağını Allah bilir. Təcrübə onu göstərir ki, komanda bütövləşirsə, nizam-intizamı qoruyursa, onda sürpriz qeydə alına bilər.

- "Turan Tovuz" ötən mövsümlə müqayisədə çox sakit görünür, epizodlara sərt etiraz etmir. Nə baş verdi ki, komanda belə dəyişdi?

- Çalışırıq ki, oyunçularımız nəinki oyunda, hər zaman intizamı qorusunlar. Bunun üzərində işləyirik. Nizam-intizamı hissələrə bölmək olmaz, bu, bütövlükdə bir anlayışdır.

- Hücumçu axtarırsınız?

- Otto Cona təklif gəlmişdi. Buna görə hücumçu axtarırdıq.