“Qarabağ”ın yeni transferi ilk dəfə “Futbolxeber”ə danışdı

“Qarabağ”ın yeni transferlərindən olan Emmanuel Addainin Futbolxeber.az saytına müsahibəsi

- Azərbaycan Premyer Liqasının V turunda “Zirə”yə qarşı oyunda “Qarabağ”ın heyətində debüt etdiniz. Təəssüratlarınız necədir?

- Əla. Çox maraqlı qarşılaşma alındı. Stadionda da gözəl atmosfer var idi. Hər iki komanda gözəl oyun sərgilədi. Komandamız vacib 3 xal qazandı.

- Debüt oyununda yeni klubunuzda qol hesabını açdınız...

- Buna görə çox şadam. Çalışacağam ki, qarşıdakı matçlarda da vurduğum qollarla komandamın uğurlarında pay sahibi olum.

- Uğurlu debütunuzu nəzərə alaraq demək olar ki, adaptasiyanız yaxşı keçir?

- Elədir. Amma daha çox çalışmalıyam. Bir qədər zamana ehtiyac var ki, baş məşqçinin taktikasına daha yaxşı uyğunlaşım. Qurban Qurbanovun meydandakı istəklərini daha yaxşı yerinə yetirmək üçün əlimdən gələni edəcəm.

- “Qarabağ”la, Azərbaycan Premyer Liqası ilə bağlı düşüncələrini nədir?

- Yaxşı komandamız var. Çempionatın da səviyyəsi yaxşıdır. Bu, dərhal hiss olunur. Komandamızda yüksək səviyyəli futbolçular cəmləşib. İnanıram ki, yaxşı mövsüm keçirə biləcəyik.

- Artıq UEFA Avropa Liqasındakı rəqiblər məlumdur. Onları necə dəyərləndirərdiniz?

- Rəqiblərimizdən bəziləri Avropanın TOP klublarıdır. Xüsusən də “Tottenhem”, “Lion” və “Ayaks”ı qeyd etmək olar. Bizi bu kollektivlərə qarşı çox maraqlı oyunlar gözləyir. Lakin “Qarabağ” da Avropada TOP klubdur. Buna görə də inanıram ki, hər şey bizim üçün yaxşı olacaq. Rəqiblərin ad-sanından çəkinməyərək istənilən rəqibə qarşı mübarizə aparmaq olar.

- “Qarabağ” ötən mövsüm Avroliqada 1/8 finala kimi irəlilədi. Bu mövsüm də eyni nəticəni təkrarlamaq nə dərəcədə realdır?

- Bu, mümkündür. Mən komandama inanıram. “Qarabağ” yenə Avroliqada 1/8 finala qədər irəliləyəcək gücdədir. 

- “Qarabağ”ın ötən mövsüm Avropada böyük marağa səbəb olan “Braqa” və “Bayer”lə oyunlarını izləmisiniz?

- “Braqa” yox, amma “Bayer”lə matçları izləmişəm. Xatırlayıram ki, “Qarabağ” ilk matçda 2:0 öndə idi. Təəssüf ki, bu üstünlüyünü sona qədər qoruya bilmədi. Səfər matçında isə son saniyələrdə uduzdu.

- Azərbaycana gəlməmişdən öncə “Qarabağ”dan, yaxud digər klublarımızdan şəxsən tanıdığınız futbolçular var?

- Yalnız daha əvvəl “Qarabağ”da çıxış etmiş Kvabena Ovusunu tanıyıram. Lakin ümumi götürdükdə, dediyim kimi, “Qarabağ” haqda məlumatım var idi. Bilirəm ki, bu komanda hər il avrokubokların qrup mərhələsində oynayır.

İbrahim Cəfərov