Mehdi Cənnətov: “Məyusedici məğlubiyyətdir”

“Bu cür oyundan sonra nəsə demək çətindir. Məyusedici məğlubiyyətdir”.

Futbolxeber.az saytına müsahibəsində bu sözləri “Sumqayıt”ın qapıçısı Mehdi Cənnətov Azərbaycan Premyer Liqasının V turunda “Araz-Naxçıvan”a 0:1 hesabı ilə uduzduqları oyundan sonra deyib.

O, azarkeşlərin etimadığını doğrulda bilmədiklərini bildirib: “Öz meydanımızda uduzduq. Halbuki qələbəyə köklənmişdik. Təəssüf ki, azarkeşlərin etimadını doğrultmadıq. Eləcə də özümüzün”.

32 yaşlı qolkiper daha çox çalışmalı olduqlarını vurğulayıb: “Rəqibin səhvlərindən sonra fərqlənmək üçün şanslarımız olsa da, onları dəyərləndirə bilmədik. Bu onu deməyə əsas verir ki, məşqlərdə daha çox çalışmalıyıq. Bu, tək bir nəfərə yox, hamıya aiddir. Komandada yeni futbolçular var. Onların adaptasiya olmaq, məşqçinin fəlsəfəsini qavramaq üçün zamana ehtiyac var”.

M.Cənnətov qarşıdakı fasilənin komandası üçün faydalı olacağını hesab edir: “Məncə, fasilə xeyrimizə olacaq. Hazırlaşmaq üçün daha çox vaxt olacaq. Xüsusən də yeni qoşulanlar üçün bu müddət faydalıdır”.

“Sumqayıt”ın qolkiper milliyə dəvət almasına da münasibət bildirib: “Əlbəttə, milliyə dəvət almaq hər zaman xoşdur. Mən də komandaya faydalı olmaq üçün əlimdən gələni edəcəm. Amma qapıçılardan hansı əsas heyətdə meydana çıxsa, digərləri onu dəstəkləyəcək. Şans qazansam, faydalı olmaq üçün əlimdən gələni əsirgəməyəcəm”.

Mehdi Cənnətov millinin azarkeş dəstəyinə ehtiyac duyduğunu söyləyib: “Əlbəttə, azarkeş amili vacibdir. Biz də ümidləri doğrultmalıyıq. Yeni baş məşqçinin rəhbərliyi altında ilk matçımıza çıxacağıq. İstərdik ki, stadion dolsun. Biz də maksimum gücümüzü qoyacağıq ki, pozitiv nəticələr qazanaq”.

Fərəc Aslanov