Elgiz Abbasov: “Səhvlərdən nəticə çıxarmalıyıq ki, daha püxtələşmiş liqanın şahidi olaq”

“Son illər I Liqa əvəzedici komandalarla birgə keçirilirdi. Bu da özünü tam doğrultmurdu. Ötən mövsüm I Liqa öz ab-havasına qayıtdı”.

Futbolxeber.az saytının məlumatına görə, bu sözləri Peşəkar Futbol Liqasının (PFL) prezidenti vəzifəsini müvəqqəti icra edən Elgiz Abbasov deyib.

I və II Liqanın püşkatma mərasimində çıxış edən PFL rəsmisi aşağı liqalarda ötən il buraxılan səhvlərin bu mövsüm təkrarlanmaması üçün çalışacaqlarını bildirib: “Bu səhvlərdən nəticə çıxarmalıyıq ki, daha irəliləmiş, daha püxtələşmiş liqanın şahidi ola bilək. Bunda klubların da üzərinə çox böyük məsuliyyət düşür. İnfrastruktur və kadr baxımından. Stadionlara mütəmadi baxışlar həyata keçirilir. II Liqaya vəsiqə qazanan “Hypers Guba”nın ev oyunlarını keçirdiyi Quba Olimpiya Kompleksinin stadionu əla durumdadır. Hətta deyərdim ki, o stadion Premyer Liqada matçlarını qəbul edə biləcək səviyyədədir”.

E.Abbasov liqaların əsasnamələrindən də söz açıb: “I Liqanın əsasnaməsi hazırdır, klublara göndərilib. II Liqa üçün də sənədlər toplusu tədbir bitdikdən sonra klub nümayəndələrinə təqdim ediləcək. II Liqada müəyyən məqamlar var ki, onların tətbiq olunması lazımdır. Ötən mövsümlə müqayisədə sifariş vərəqəsi ilə bağlı dəyişiklik olub. Əvvəl 40 futbolçu sifariş etmək mümkün idisə, bu mövsüm say 35-ə endirilib. Müəyyən tənzimləmələrə ehtiyac var. Artıq ikinci il olduğunu nəzərə alaraq, II Liqada məşqçilərin lisenziyasının olması tələb kimi klubların qarşısına qoyulub”.

Elgiz Abbasov reqlamentdən də söz açıb: “Sonuncu yer istənilən halda liqanı tərk edəcək. Eləcə də pley-off oyunlarının birə endirilməsi qərara alınıb. Həlledici matç neytral meydanda keçiriləcək. Ötən il olduğu kimi, bu mövsüm də PFL-in Media departamenti qarşılaşmaların yutub vasitəsi ilə canlı yayımını təşkil edəcək. Kütləvilik üçün müəyyən yol xəritəmiz var. Təqvim qarşıdakı günlərdə açıqlanacaq. Ötən mövsüm olduğu kimi, yenə də I Liqa 3, II Liqa isə 2 dövrədən ibarət olacaq”.

Fərəc Aslanov