Hüseynəli Quliyev: “Neftçi” ilə oyunda 1 xal da 1 xaldır”

“Səbail”in qapıçısı Hüseynəli Quliyevin Futbolxeber.az saytına müsahibəsi

- “Neftçi” ilə çətin oyunda 1:1-lik heç-heçəyə nail oldunuz. Bərabərliyi necə şərh edərdiniz?

- Komanda yoldaşlarıma təşəkkür edirəm. “Neftçi”yə qarşı çox yaxşı mübarizə apardıq. Düzdür, qələbə qazana bilmədik. Lakin 1 xal da 1 xaldır. İndiki məqamda bizə əsas uduzmamaq lazım idi. Çünki ilk turda “Zirə” ilə matçda zəif təsir bağışlamışdıq. O psixologiyadan çıxa bildik. “Neftçi”nin güclü olduğunu nəzərə alsaq, bu, pis nəticə deyil.

- “Zirə”yə məğlubiyyətdən sonra “Neftçi” ilə matça hazırlaşmaq psixoloji baxımdan çətin olmadı?

- Düzdür, məğlubiyyətdən sonra futbolçularda ruh düşkünlüyü olur. Amma maksimum çalışırdıq ki, bu vəziyyətdən çıxaq. Şükür ki, “Neftçi” ilə oyunda istəyimizə nail olduq. Ən azı 1 xal qazanmağı bacardıq.   

- “Neftçi” ilə matçda “Səbail” həqiqətən də çox xoş təsir bağışladı. “Zirə”yə qarşı bu cür oyun göstərməyinizə nə mane olmuşdu?

- Komandamızda futbolçuların çoxu yenidir. Ötənilki heyətdən cəmi 2-3 nəfər qalıb. Yeni gələnlər mütləq adaptasiya dövrü keçməlidirlər. “Zirə” isə bizdən fərqli olaraq mövsümə daha erkən başlayıb, üstəlik, avrokuboklarda oynayır. Konfrans Liqasında çox yaxşı çıxış edirlər. Deyərdim ki, bu dəqiqə ən yaxşı formada olanlar “Qarabağ” və “Zirə”dir.

- Maraqlı bir statistika var. Ötən mövsümə də 1:4 hesablı məğlubiyyətlə başladınız, bu mövsümə də. 1 il əvvəl də ikinci turda “Neftçi” ilə 1:1-lik heç-heçəyə imza atdınız, indi də. Belə çıxır ki, ötənilki kimi üçüncü turda uduzub, dördüncü turdan yüksəlişə keçəcəksiniz?

- Yox (gülür). Bu futboldur, hər bir nəticə qeydə alına bilər. Ötənilki və indiki mövsümdə ilk iki turda nəticələrin təkrarlanması sadəcə təsadüfdür. Maksimum çalışcağıq ki, bu dəfə daha yaxşı oyun göstərək.

- İlk 2 turdakı çıxışınızdan nə dərəcədə razısınız?

- Öz oyunum barədə danışmağım düzgün çıxmaz. İstəyirəm ki, günü-gündən inkişaf edim. Daha da yaxşı olmaq fikrim var. Bunun üçün isə mütləq artırmalıyam.

- Bu sözümdən yəqin inciməzsiniz, Səlahət Ağayev gedəndən sonra çoxları “Səbail”in təcrübəli qapıçı transfer edəcəyini gözləyirdi. Lakin ilk gündən istər Şahin Diniyevlə, istər klub rəhbərliyi ilə söhbətlərdə onların sizə böyük inamlarının olduğunu müşahidə etdim. Etimadı doğrultmamaq qorxusu sizdə gərginlik yaratmır?

- Xeyr, heç bir gərginlik yoxdur. İstəır baş məşqçimiz, istər klub rəhbərliyi sağ olsun ki, mənə inanırlar, etimad göstərirlər. Mən də bu inamı doğrultmaq üçün əlimdən gələni edəcəm. Başa düşürəm ki, bu, mənim üçün bir şansdır. Ondan maksimum dərəcədə faydalanmalıyam.

İbrahim Cəfərov