Aleksey İsayev: “Hər şeyi edəcəyik ki, ÇL-in qrup mərhələsinə yüksələk”

“Hesaba baxmayaraq, oyun çətin alındı. Çünki optimal formada deyilik. Hər gün formamızı bərpa etmək üçün çalışırıq, işləyirik. Zamanla hər şey daha yaxşı olacaq. Komandamızı qələbə münasibəti ilə təbrik edirəm. “Araz-Naxçıvan”a da növbəti oyunlarda uğurlar arzulayıram”.

Futbolxeber.az saytına müsahibəsində bu sözləri “Qarabağ”ın yarımmüdafiəçisi Aleksey İsayev Azərbaycan Premyer Liqasının ilk turunda "Araz-Naxçıvan”ı 4:1 hesabı ilə məğlub etdikləri oyun barədə danışarkən deyib.  

O, hər iki cəbhədə uğur qazanmaq istədiklərini vurğulayıb: “Bütün gücümüzü səfərbər edirik ki, həm daxili arenada, həm də Çempionlar Liqasında uğur qazanaq. Azarkeşlərimizi sevindirmək istəyirik. Bu, klubumuz və Azərbaycan futbolu üçün də çox önəmlidir”.

29 yaşlı futbolçu qarşıdakı “Ludoqorets”lə görüş haqda da fikirlərini açıqlayıb: “Növbəti matçı “Ludoqorets”ə qarşı keçirəcəyik. Hazırda bütün fikrimiz bu oyuna yönəlib. Həmin görüş bizim üçün çox vacibdir. Əlimizdən gələni edəcəyik ki, azarkeşlərimizi sevindirək”.

A.İsayev azarkeşlərin Çempionlar Liqasının qrup mərhələsi ilə bağlı istəyinə belə münasibət bildirib: “Hər şeyi edəcəyik ki, ÇL-in qrup mərhələsinə yüksələk. Bu, bizim məqsədimizdir”.

Fərəc Aslanov