Elvin Bədəlov: “Ağıllı oyun və xarakter hesabına qələbə qazandıq”

“Sumqayıt”ın müdafiəçisi Elvin Bədəlovun Futbolxeber.az saytına müsahibəsi

- Yeni mövsümə 3 xalla start verdiniz. “Kəpəz” üzərində qazanılan 2:0 hesablı qələbəni necə şərh edə bilərsiniz?

- Oyun yaxşı keçdi. İlk dəqiqələrdən göstərdik ki, qələbəyə layiqik. Matça nəzarət bizdə idi. Qol epizodlarımız da oldu. İlk hissədə daha 2-3 qol vura bilərdik. Bunun üçün şanslarımız da vardı. Lakin alınmadı.

- İkinci hissədə “Kəpəz”in təzyiqi artırmasını nə ilə əlaqələndirə bilərsiniz?

- Həqiqətən də ikinci hissədə rəqib təzyiqi artırdı. Biz ilk yarıda yaxaladığımız şansları dəyərləndirsəydik, belə olmazdı. Əgər fasiləyə qədər daha 1-2 qol vursaydıq, ikinci 45 dəqiqə bundan rahat alınardı.

- Qələbəyə baxmayaraq, parlaq oyun sərgiləmədiniz. Demək olar ki, rəqib “Kəpəz” yox, daha iddialı klub olsaydı, 3 xal qazanmaq çətin olardı?

- Ola bilər. Amma biz də o deyildik. Həm fiziki, həm də psixoloji cəhətdən yorğun idik. Ayaqlar getmirdi. Ağıllı oyun və xarakter hesabına qələbə qazandıq.

- Baş məşqçiniz Samir Abasov heyətin geniş olmamasından şikayətlənir. Vitse-kapitan kimi onun fikirləri ilə razısınız?

- Düşünürəm ki, transferlərə ehtiyacımız var. Mövsüm boyu bu heyətlə oynayacağımıza inanmıram. Yəqin ki, qarşıdakı günlərdə komandaya qoşulan yeni futbolçular olacaq.

- Növbəti turda səfərdə “Turan Tovuz”la qarşılaşacaqsınız. Həmin oyuna qədər həm fiziki, həm də psixoloji cəhətdən komanda toparlana biləcək?

- Buna inanıram. Çalışacağıq ki, hazır olaq. Vaxtımız var. Dincəlmək lazımdır. Bir qədər psixoloji durum narahat edir. Ümid edirəm ki, Tovuzdakı oyuna kimi daha yaxşı vəziyyətdə olarıq.

Fərəc Aslanov