“Məni heyətində görmək istəyən klublar arasında “Araz-Naxçıvan” daha istəkli idi”

"Araz-Naxçıvan”ın yeni transferlərindən olan Bəxtiyar Həsənalızadənin Futbolxeber.az saytına müsahibəsi

- “Araz-Naxçıvan”a keçidiniz necə baş tutdu? Başqa klublardan da təklif oldu?

- Başqa təkliflər var idi. Lakin hələ Türkiyədə oynayarkən, çempionatın bitməsinə 1 ay qalmış “Araz-Naxçıvan”dan təklif gəldi. Belə deyim də, məni heyətində görmək istəyən klublar arasında “Araz-Naxçıvan” daha çox istəkli idi. Bu səbəbdən də seçimim onların lehinə oldu.

- Qeyd etdiniz ki, digər klublardan da təklif var idi. Həmin sizi heyətində görmək istəyənlər arasında xarici klublar da var idi?

- Yox, ancaq yerli klublar idi. Çünki Türkiyədə transfer pəncərəsi mən “Araz-Naxçıvan”la razılaşandan sonra açıldı. Orda qalmağa qərar versəydim, gözləyəcəkdim. Çünki dediyim kimi, Türkiyədə transferlər bir qədər gec başlayır.

- Vətənə qayıtmağınıza səbəb nə oldu?

- Ailə məsələləri. Ona görə də xırdalığa getmək istəmirəm.

- Türkiyədə keçirdiyiniz bir mövsümü necə dəyərləndirirsiniz?

- Ora gedərkən çətin idi. Çünki kluba toplanış keçmədən, çempionat başlayanda qoşuldum. Buna görə də ilk 4 oyunda meydana çıxmadım. Bu da normal idi. Yavaş-yavaş toparlandım. Yaxşı başlamasa da, sonradan hər şey qaydasına düşdü. Məncə, mövsüm mənim üçün uğurlu alındı.

- Son mövsüm siz də daxil olmaqla bir neçə futbolçumuz Türkiyə birinci liqasında çıxış etdi. Bu marağın səbəbini nədə görürsünüz?

- Məncə, Türk dövlətlərindən olan futbolçuların legioner sayılmaması bu marağın əsas səbəbidir. Eləcə də gedənlər sonrakılara yol açdılar. Məsələn, Coşqun Diniyev inamlı oyunu ilə seçildi. Daha sonra Ramil, Sərtan da özlərini yaxşı tərəfdən göstərdilər. Bu səbəbdən də indi Türkiyədə futbolçularımıza daha çox maraq var.

- “Tuzlaspor”la aranızda yaranan problemlərlə bağlı nə yenilik var?

- Problemlərdən biri artıq həll olunub, sərbəst qalmışam. Bircə pul məsələsi qalıb. Artıq FİFA-ya müraciət olunub. Yəqin ki, ali futbol qurumu tezliklə bu barədə qərar verəcək.

- Sirr deyilsə, “Tuzlaspor”un sizə nə qədər borcu var?

- 3 aylıq maaşdan söhbət gedir.

- “Araz-Naxçıvan”dakı hədəfləriniz nədir?

- Fərdi şəkildə məqsədim komandama xeyir verməkdir. Əsas heyət üzvünə çevrilmək istəyirəm. “Araz-Naxçıvan”da möhkəmlənməyi, eləcə də milliyə mütəmadi olaraq dəvət almağı hədəfləyirəm.

- Hesab etmirsiniz ki, Vətənə qayıtmaqla milliyə dəvət almaq şansını bir qədər çətinləşdirdiniz? Çünki legioner futbolçuya maraq daha çox olur...

- Razıyam, xaricdə oynayanda daha çox diqqət mərkəzində olursan. Amma burda da göz önündə olursan, məşqçilərin səni izləmək şansı daha çox olur. Bütün oyunlar izlənilir.

- Millimizin yeni baş məşqçisi Fernandu Santuşla bağlı hansı fikirdəsiniz?

- Santuş çox təcrübəli məşqçidir. Portuqaliyanı Avropa çempion etmiş mütəxəssisdir. Onun təcrübəsindən istifadə etmək lazımdır.

İbrahim CƏFƏROV